İlham Əliyev ABŞ rəsmisinə Trampın hədiyyəsini göstərdi - VİDEO
Prezident İlham Əliyev ABŞ Dövlət katibinin köməkçisi Kaleb Orrla bugünkü görüşü zamanı ona daha əvvəl ABŞ Prezidenti Donald Trampdan aldığı xatirə hədiyyəsini nümayiş etdirib.
TodayPress TV xəbər verir ki, söhbət ABŞ-nin Azərbaycana münasibətdə mühüm əhəmiyyət daşıyan qərarlardan biri ilə bağlı sənəddən – Azadlığa Dəstək Aktına 907-ci düzəlişin qüvvədən düşməsinə dair memorandumdan gedir.
Qeyd edək ki, 907-ci düzəliş 1992-ci ildə ABŞ Konqresi tərəfindən Azadlığa Dəstək Aktına əlavə edilmiş və Azərbaycana ABŞ hökumətinin birbaşa dövlət yardımını qadağan etmişdi. Geniş yayılmış fikrə görə, bu düzəliş erməni lobbisinin təşəbbüsü ilə qəbul olunub. Nəticədə Azərbaycan ABŞ-dən birbaşa dövlət yardımı ala bilməyən yeganə postsovet ölkəsinə çevrilmişdi.
Sonradan ABŞ administrasiyası tərəfindən 907-ci düzəlişin tətbiqinin dayandırılması və bununla bağlı memorandumun imzalanması Azərbaycan-ABŞ münasibətlərində mühüm hadisələrdən biri kimi qiymətləndirilib. Prezident İlham Əliyevin Kaleb Orrla görüş zamanı həmin sənədi nümayiş etdirməsi də bu qərarın iki ölkə arasındakı əlaqələrdə xüsusi yer tutduğunu göstərib.
