Şarl Lekler: “Ferrari”nin favorit olacağı tras tapmaq çətindir”

“Ferrari” pilotu Şarl Lekler mövsümün qalan hissəsində komandasının  “McLaren”lə mübarizədə heç bir trasda favorit olmayacağını bildirib. 

TodayPress TV xəbər verir ki, o, rəqibin daha stabil və sürətli olduğunu deyib: 

“Əmin deyiləm. Hazırda elə bir tras yoxdur ki, orada “Ferrari” mütləq “McLaren”dən güclü olsun. Əgər stabilikdən danışırıqsa, mövsümün ən yaxşı bolidi “McLaren”dir. “Red Bull”un forması o qədər də sabit deyil, eyni sözləri “Ferrari” və “Mercedes” barədə də demək olar. Daimi olan yeganə faktor “McLaren”in sürətidir. Buna görə də indiki vəziyyətdə “Ferrari”nin favorit olacağı tras tapmaq çətindir. Amma ümid edirəm ki, nəticədə xoş sürprizlə qarşılaşacağam”, – deyə Lekler bildirib.

Qeyd edək ki, “Formula-1” üzrə dünya çempionatının təqvimində hələ 10 yarış qalıb. 14 mərhələdən sonra “McLaren” yalnız Kanada Qran-prisində podiuma yüksələ bilməyib. Şarl Lekler hazırda şəxsi hesabda 5-ci pillədə qərarlaşıb və “Formula-1” karyerasında 8 qələbəsi var.

Namiq HUN