Kollecə qəbul olmaq istəyənlərin DİQQƏTİNƏ! Bu, CİDDİ RİSK yaradacaq
Dövlət İmtahan Mərkəzi (DİM) tərəfindən 2026-cı ildə ümumi (9 illik) orta təhsil səviyyəsi üzrə buraxılış imtahanlarının 5, 12 və 26 aprel tarixlərində keçirilməsi planlaşdırılır.
Bu il gözlənilən yeniliklər və mövcud mexanizmlə bağlı təhsil eksperti Ramin Nurəliyev TodayPress TV-yə danışıb.
O bildirib ki, imtahanların aprel ayında keçirilməsi şagirdlər üçün müsbət haldır.
“Çünki 11-ci siniflərin buraxılış imtahanları mart ayında keçirilir və onların yoxlanılması, nəticələrin elan edilməsi prosesi aprel ayına təsadüf edir. Bu səbəbdən Dövlət İmtahan Mərkəzi 9-cu siniflərin kollec seçimini məhz aprel ayında keçirməyə məcburdur. Buraxılış imtahanlarının may-iyun aylarında keçirilməsi arzuolunan olsa da, mövcud şəraitdə bu mümkün deyil. İmtahanların yoxlanılması üçün 3-4 həftə vaxt tələb olunur, yazılı cavabların markerlər tərəfindən qiymətləndirilməsi, apellyasiya mərhələsi və digər imtahan prosesləri DİM-in iş yükünü xeyli artırır”.
Ekspertin sözlərinə görə, 9-cu sinfi bitirən və kolleclərdə təhsil almaq istəyən şagirdlər üçün böyük ehtimalla mart ayında elektron ərizə ilə müraciət prosesi həyata keçiriləcək. Müraciətlərdən sonra buraxılış imtahanının nəticələrinə əsasən 9 illikdən kolleclərə seçim aparılacaq.
O, xüsusilə potensiallı şagirdlərə 9-cu sinifdən kolleclərə müraciət edərkən çox diqqətli olmağı tövsiyə edib.
“Müəyyən akademik və intellektual potensiala malik şagirdlərin erkən mərhələdə kollec seçimi gələcəkdə ciddi məhdudiyyətlər yarada bilər. 9-cu sinifdən kollecə qəbul olan şagird seçdiyi ixtisasdan sonradan imtina edə bilmir və yalnız həmin istiqamət üzrə subbakalavr kimi ali təhsil müəssisələrinə müraciət etmək hüququ qazanır. Məsələn, maliyyə, turizm və ya iqtisadiyyat yönümlü ixtisas seçən şagird gələcəkdə bu sahənin ona uyğun olmadığını anlasa belə, başqa istiqamətə keçid edə bilmir”.
Mütəxəssis əlavə edib ki, potensiallı bir şagird 9-cu sinifdən turizm və ya iqtisadiyyat ixtisasına qəbul olarsa, sonradan onun İT, kompüter mühəndisliyi və ya tibb kimi sahələrə yönəlmək imkanı itir. Bu isə gələcək karyera baxımından ciddi risk hesab olunur.
“Buna görə də potensiallı şagirdlərin 11-ci sinfə qədər oxuyaraq birbaşa ali təhsil müəssisələrinə qəbul olmaları daha məqsədəuyğundur. Potensialı zəif olan şagirdlər üçün 9-cu sinifdən kollecə müraciət yaxşı fürsət hesab oluna bilər. Belə şagirdlər kollec təhsilini başa vurduqdan sonra subbakalavr kimi ali təhsil müəssisələrinə imtahansız qəbul olmaq imkanı əldə edirlər ki, bu da onlar üçün mühüm üstünlükdür”, - deyə Ramin Nurəliyev qeyd edib.
Türkan İsgəndərli
