Avropa Amerika qazından məhrum ola bilər

Avropa İttifaqı (Aİ) enerji böhranının ortasında Amerika mayeləşdirilmiş təbii qazından (LNG) məhrum qala bilər.

TodayPress TV xəbər verir ki, bu barədə ABŞ-nin Aİ-dəki daimi nümayəndəsi Endryu Puzder “Financial Times” qəzetinə verdiyi müsahibədə bildirib.

Puzder qeyd edib ki, Aİ Vaşinqtonla bağlanmış və Avropanın ABŞ-yə bütün ixracına 15% tarif tətbiqini nəzərdə tutan sazişi ratifikasiya etməzsə, enerji böhranının ən qızğın vaxtında Amerika mayeləşdirilmiş təbii qazından məhrum qala bilər.

O xəbərdarlıq edib ki, Avropa Parlamenti müqavilənin ratifikasiyasını üçüncü dəfə təxirə salsa və ya sənədə hər hansı əlavə bənd əlavə etməyə cəhd etsə, Aİ nəticələrlə üzləşəcək:

"Əgər onlar müqaviləni yekunlaşdırmasalar, enerjiyə nə olacaq, bilmirəm. Düşünürəm ki, ABŞ yenə də Avropa ilə iş görmək istəyəcək, amma şərtlər o qədər də əlverişli olmaya bilər. Bundan əlavə, digər alıcılar da var".

Aysel Mətləb

TodayPress TV