ABŞ senatoru İsrailə silah satışını qadağan edən qanun layihəsi təqdim etdi

ABŞ Senatoru Berni Sanders İsrailə təxminən 660 milyon dollar dəyərində bomba satışını qadağan edən qanun layihəsini təqdim edib. 

TodayPress TV xəbər verir ki, bu barədə xarici KİV məlumat yayıb. 

Bildirilib ki, müstəqil ABŞ senatoru Sanders, senatorlar Kris Van Hollen, Ceff Merkli və Peter Uelç ilə birlikdə İsrailə planlaşdırılan silah satışını dayandırmaq üçün birgə tədbirlər görüblər. 

Sanders ABŞ Prezidenti Donald Tramp administrasiyası tərəfindən bu yaxınlarda təsdiqlənmiş 20 mindən çox bombanın İsrailə göndərilməsinin qarşısını almaq üçün digər senatorlardan dəstək istədiklərini bildirib. 

"İsrail hökumətinin Qəzza, İran və Livanda yaratdığı dəhşətli dağıntıları nəzərə alsaq, Amerika vergi ödəyicilərinin hazırda etməli olduğu son şey Netanyahu hökumətinə 22 min yeni bomba təmin etməkdir. Qanunsuz müharibəni dəstəkləmək üçün artıq silah yoxdur”, - deyə Sanders vurğulayıb. 

Qeyd edək ki, ABŞ administrasiyası tərəfindən təsdiqlənən və İsrailə göndəriləcək silah paketinə 5 min kiçik silah, 10 min 250 kiloqramlıq bomba və 12 min 500 kiloqramlıq bomba daxildir, ümumilikdə 22 min bombanın dəyəri təxminən 660 milyon dollardır. 

Aysel Mətləb

TodayPress TV