Çində kilsəyə basqın oldu
Çin polisi həftəsonu ölkənin ən böyük yeraltı kilsələrindən biri olan Sion Kilsəsinin bir neçə pastorunu həbs edib.
TodayPress TV "Reuters"ə istinadən xəbər verir ki, kilsə sözçüsü və ailələri bunun 2018-ci ildən bəri xristianlara qarşı ən böyük basqı olduğunu bildirib.
Həbs olunan pastorlar arasında kilsənin qurucusu Jin Minqri də var.
ABŞ Dövlət Katibi Marko Rubio dərhal onların azad edilməsini tələb edib.
Çin hakimiyyəti qeyri-rəsmi “ev kilsələri”ni və internet üzərindən dini fəaliyyətləri qadağan edən yeni qaydalar çərçivəsində bu tədbirləri həyata keçirib.
Son məlumatlara görə, həbs edilən pastorların bir qismi azad olunub, lakin 20-yə yaxın kilsə lideri hələ də həbsdədir. Pastor Jin-in sağlamlığı ilə bağlı narahatlıqlar var, onun vəkillərlə görüşməsinə icazə verilmir.
Sion Kilsəsi 2007-ci ildə Jin tərəfindən təsis olunub və COVID-19 dövründə Zoom və kiçik yığıncaqlar vasitəsilə üzvlərini artırıb. İnsan hüquqları təşkilatları bu hadisəni Çində dini azadlıqların pozulması kimi qiymətləndirir.
Jalə Rövşən
