Türkiyə hədəfdədir: ABŞ-İsrail ittifaqı Türkiyəyə qarşı təhdid yaradır? – Politoloq açıqladı
Türkiyənin istefada olan kəşfiyyat polkovniki Coşqun Başbuğ bildirib ki, PKK lideri Duran Kalkanın “Bu müharibənin mərkəzi Türkiyədir” açıqlaması ABŞ-İsrail ittifaqının Ankaraya yönəlik üstüörtülü təhdidi kimi qiymətləndirilməlidir.
Onun sözlərinə görə, ABŞ Kiprdə İsrail və SDQ üçün logistik mərkəz rolunu oynayan bazalar yaradır və bu, Böyük Britaniyanın da dəstəklədiyi yeni Şərqi Aralıq dənizi ittifaqının formalaşmasına işarədir.
Sözügedən məsələ ilə bağlı TodayPress TV-yə danışan politoloq Tofiq Abbasov bildirib ki, bu narahatlıq tamamilə əsaslıdır:
“Bu narahatlığı Türkiyənin keçmiş kəşfiyyat orqanı nümayəndəsi açıqlayır və bu çox haqlı bir narahatlıqdır. Çünki biz dünya siyasətinin indiki trendlərinə fikir versək, görərik ki, dünyanı yeni sferalara bölmək istəyirlər. Və bu prosesdə aparıcı mövqedə olmaq istəyənlər Qərb dövlətləridir. Xüsusilə ABŞ və Böyük Britaniyadır. Avropa İttifaqı burada bir qədər passiv mövqe sərgiləyir. Bu da ondan irəli gəlir ki, London və Vaşinqton onları əsas proseslərdən və qərarların qəbulundan kənarda saxlayır. Çünki onlar bu inhisarı əllərində saxlamaq niyyətindədirlər”.
Politoloq vurğulayıb ki, hazırda Türkiyə hədəfdədir:
“Tək Türkiyə yox, İran və Pakistan da. Bunlar İslam birliyinin ən aparıcı dövlətləridir. Öz strateji resurs bazasına və potensialına görə onlardan həm çəkinirlər, həm də onları proseslərdən kənarda saxlamağa çalışırlar. Burada İsrail dövlətinin təyinatına fikir verməliyik. Bu, sözün əsl mənasında klassik dövlət deyil. Bu, Amerika və Qərb siyasətinin ötürücüsünə çevrilmiş bir məmləkətdir. Tam anlamı ilə sifarişlə çalışan bir gücdür".
Politoloq son İsrail-İran toqquşmasına diqqət çəkib:
"ABŞ gördü ki, İsrailin vəziyyəti gərgindir və İran raket zərbələri ilə onu darmadağın edə bilərdi. Tramp prosesə qatılmalı oldu və demək olar ki, İsrailin nicatını təmin etdi. Ancaq məsələ köklü həllini tapmadı. İranı nə parçalaya, nə rejimini dəyişə, nə də daxilində istədikləri konfiqurasiyanı yarada bildilər. Ona görə də məsələ bitməyib, onun ikinci hissəsi var. İsrail ancaq Britaniya və ABŞ-nin siyasətinin sipəri, buferidir".
Analitik qeyd edib ki, ABŞ, İsrail və Böyük Britaniyanın dəstəyi ilə bölgədə böyük plan həyata keçirilir:
“Bu planın birinci mərhələsi Kürd dövlətinin yaradılmasıdır. Suriyanın hansı vəziyyətdə olduğunu da görürük. Məqsəd bölgəni daimi münaqişə içində saxlamaqdır. Dünya artıq elə bir həddə çatıb ki, mübarizə qaçılmazdır. Hazırda dünyada 120-yə yaxın kiçik və orta münaqişə ocağı var. Onlar bir qığılcımla dünya müharibəsinə çevrilə bilər".
Sonda mütəxəssis bildirib ki, İsrailin mövcudluğu tamamilə ABŞ-nin dəstəyindən asılıdır:
“Yaxın vaxtlarda İsrailin müqəddəratı həll oluna bilər. Dünya dəyişib və xalqlar suverenliyini qorumaq istəyirlər. Bu isə Qərbin neomüstəmləkəçiliyinə qarşı duruşun başlanğıcı ola bilər.
Tramp nə qədər BRICS dağılır desə də, yalandır. Əksinə, Rusiya, Çin, İran və Şimali Koreya kimi ölkələr öz koalisiyalarını yaradırlar. Bu, yeni dünya nizamının formalaşması deməkdir".
Jalə Rövşən
FOTOLAR
