9 May paradı Rusiyanın gücünü deyil, Putinin zəifliyini nümayiş etdirdi.
TodayPress TV xəbər verir ki, bunu bir sıra nüfuzlu Qərb mediası yazıb.
"The New York Times" nəşri bildirib ki, parad hərbi qüdrətdən daha çox Kremlin artan narahatlığının göstəricisi kimi qiymətləndirildi. Qırmızı Meydanda ağır hərbi texnikanın məhdud görünməsi fonunda Moskva əsas diqqəti Ukraynanın mümkün hücumlarına qarşı gücləndirilmiş təhlükəsizlik tədbirlərinə yönəltmişdi.
"The Atlantic" isə Rusiyanın sürətlə məğlubiyyətə doğru irəlilədiyini yazıb.
Üç ildən sonra ilk dəfə olaraq müharibədə təşəbbüsün Ukraynanın tərəfinə keçdiyi bildirilir. Ukrayna artıq vəziyyəti dəyişməyə başlayıb və demək olar ki, bütün cəbhələrdə Rusiyaya artan itkilər verir.
Rusiyanın yaz hücumu nəinki uğursuz oldu, hətta aprel ayında Rusiya qüvvələri 2024-cü ilin avqustundan bəri ilk dəfə xalis ərazi itkiləri ilə üzləşdi. Son 30 gün ərzində Rusiya 113 kv. kilometr əraziyə nəzarəti itirib. Cəbhə xətti boyunca təxminən 20 kilometrlik pilotsuz uçuş aparatlarının təsir zonası Rusiyanın dərinliklərinə doğru genişlənməkdədir.
Ukrayna sərhədindən təxminən 2000 kilometr uzaqlıqda yerləşən iqtisadi və hərbi hədəflərə mütəmadi zərbələr endirilir. Ümumilikdə bu vəziyyət müharibədə dönüş nöqtəsi təsiri bağışlayır.
Əgər Rusiya yaxın zamanda nəticə əldə edə bilməsə, bəzi istiqamətlərdə vəziyyətin tamamilə çökməsi mümkündür. Putinə hesabat təqdim edilməli olsaydı, ortaya çıxan mənzərə kifayət qədər ağır görünərdi.
TodayPress TV
