Düzgün işıqlandırma necə olmalıdır?
Həm təbii, həm də süni işıqlandırmanın birlikdə istifadə edilməsi göz sağlamlığı üçün təhlükəli sayılmır. Mütəxəssislərin fikrincə, düzgün işıqlandırma şəraiti görmə orqanlarının gərginliyini azaldır və uzunmüddətli görmə problemlərinin qarşısını almağa kömək edir.
TodayPress TV xəbər verir ki, xüsusilə ofis şəraitində işləyən insanlar arasında görmə ilə bağlı problemlər çox zaman işığın düzgün seçilməməsi ilə əlaqədardır. Kompüterlə işləyərkən otaqda kifayət qədər işıq olmalı, təbii və süni işıq arasında balans qorunmalıdır. Ekran özü işıq mənbəyi olsa da, tam qaranlıqda işləmək tövsiyə olunmur, çünki bu, monitorun işığı ilə otaq arasındakı kəskin kontrast səbəbindən gözlərin daha çox yorulmasına səbəb olur.
Ən uyğun işıqlandırma forması yan tərəfdən gələn, bərabər paylanmış və diffuz işıqdır. Qarışıq işıqlandırmadan istifadə etmək mümkündür, lakin birbaşa günəş şüalarının ekrana düşməsi arzuolunmaz hesab edilir, çünki bu zaman parıltı yaranır və bu da gözləri yorur.
Televizora baxarkən də oxşar qaydaların tətbiqi vacibdir. Belə ki, ekranla olan məsafə onun dörd diaqonalına bərabər olmalı, otaqda isə göz üçün rahat işıqlandırma təmin edilməlidir. Xüsusilə gecə saatlarında və tam qaranlıq mühitdə televizora baxmaq məsləhət görülmür. Ekrana birbaşa yönəlmiş lampalar da parıltı yaradaraq narahatlıq törədir. Bu səbəbdən, yumşaq və diffuz işıq mənbələrindən, məsələn, torşer və ya televizor arxasındakı arxa işıqlandırmadan istifadə etmək tövsiyə olunur.
Türkan İsgəndərli
