Taksi sürücüləri üçün təlimlər davam etdirilir
Taksi minik avtomobilləri ilə sərnişindaşıma sahəsində göstərilən xidmətin keyfiyyətinin yüksəldilməsi və daha əlçatan olması məqsədilə AYNA tərəfindən taksi sürücülərü üçün təlimlər davam etdirilir.
TodayPress TV xəbər verir ki, bu günədək 46656 sürücü nəzəri və praktiki təlimlərə cəlb olunub. Proqramın yekununda DİM tərəfindən imtahan təşkil edilir. İndiyədək 35929 sürücü imtahandan keçib.
Qeyd edək ki, təlim zamanı iştirakçılara taksi ilə sərnişindaşıma qaydaları, sürücü və sərnişinlərin hüquq və vəzifələri, nəqliyyat vasitələri və sürücülərə dair tələblər, eləcə də etik davranış qaydaları aşılanır. Tədris proqramına taksi fəaliyyətində tətbiq edilən müasir texnologiyalar və proqram təminatlarından istifadə, sürücünün iş və istirahət rejimi normalarına riayət olunması, hərəkətin təhlükəsizliyinin təmin edilməsi və ilk tibbi yardımın göstərilməsi kimi mövzular daxil edilib.
Taksi minik avtomobilində sürmə təlimi zamanı hərəkətə başlama, manevretmə və avtomobillərin yolun hərəkət hissəsində yerləşdirilməsi qaydalarına uyğun idarəetmə, sərnişinlərin rahatlığını və təhlükəsizliyini təmin edən idarəetmə üsulları, mürəkkəb yol şəraitində, eləcə də hərəkətin intensiv olduğu yollarda və sutkanın qaranlıq vaxtı taksi minik avtomobilinin idarə edilməsi aşılanır.
