Somali ordusunun modernləşdirilməsində Türkiyə-Azərbaycan faktoru: Strateji tərəfdaşlıq
Türkiyə Somalidə Xüsusi Hava Qüvvələri Komandanlığı yaradacaq. Komandanlıq hücum helikopterləri, qırıcı və hərbi nəqliyyat təyyarələri ilə təchiz olunacaq və Somali Milli Ordusunun əməliyyat imkanlarını gücləndirəcək. Bu addım Ankara ilə Moqadişu arasında təhlükəsizlik və terrorizmə qarşı əməkdaşlığın strateji hissəsidir.
Türkiyənin Somalidə Xüsusi Hava Qüvvələri Komandanlığı yaratması bölgədə təhlükəsizlik və terrorizmə qarşı əməkdaşlığı necə gücləndirə bilər? Son Somali -Azərbaycan yaxın münasibətləri fonunda Azərbaycan da bu prosesə qoşula bilərmi ?
Məsələ ilə bağlı TodayPress TV-yə danışan politoloq Elçin Xalidbəyli bildirib ki, Türkiyə Somalidə hərbi və təhlükəsizlik mövqeyini gücləndirir:
"Türkiyə son illərdə Afrika ölkələrinə xüsusi diqqət yetirir. Bir çox Afrika dövləti ilə ikitərəfli iqtisadi və hərbi təhlükəsizlik sahəsində əməkdaşlıq anlaşmaları imzalayır və bu istiqamətdə fəaliyyətini gücləndirir. Somali də belə ölkələrdən biridir. Somalinin Afrikadakı strateji mövqeyi kifayət qədər yüksəkdir. Buna görə də Türkiyə hazırda Somalidə mövcudluğunu artırır. Bu ölkənin hakimiyyəti ilə Türkiyənin olduqca yaxın münasibətləri mövcuddur. Rəsmi Ankara Somaliyə ordunun yenidən qurulması və döyüş potensialının, eləcə də hərbi təlim standartlarının yüksəldilməsi məsələsində dəstək verir. Eyni zamanda Somalidə mövcud daxili problemlərin idarə olunmasında da Türkiyə yardım göstərir".
Analitik vurğulayıb ki, Türkiyə Somalidə hərbi bazalar qurur Azərbaycan isə paralel əməkdaşlıq edir:
"Ən əsası isə Türkiyə bu ölkədə hərbi bazaların yaradılmasına başlayıb. Bu bazalar Afrikada hərbi-siyasi situasiyaya nəzarət etmək və vacib məqamlarda müdaxilə etmək imkanları yaradır. Təbii ki, Azərbaycan da Somaliyə münasibətdə müəyyən pozitiv addımlar atır. Türkiyə və Azərbaycan dünyanın bir çox regionlarında ortaq mövqedən çıxış edir və ortaq maraqlar çərçivəsində hərəkət edirlər. Somali də bu ölkələrdən biridir. Azərbaycanın da bəzi Afrika ölkələri ilə münasibətləri yeni mərhələyə qədəm qoyub və Somali xüsusi diqqət yetirilən ölkələr sırasındadır. Azərbaycan da Türkiyə ilə paralel şəkildə Somalidə əməkdaşlıq və tərəfdaşlıq istiqamətində addımlar atır. Bu isə göstərir ki, Azərbaycan və Türkiyə dünyanın bir çox regionlarında ortaq maraqlara malikdir və bu maraqların reallaşdırılması üçün bir-biri ilə konsensus şəraitində fəaliyyət göstərirlər".
Jalə Rövşən
