Paşinyan Azərbaycan vasitəsilə xilas formulunu elan etdi - RƏY

“Ermənistan artıq reallıqları qəbul edir və Azərbaycanla nəqliyyat əlaqələrini inkişaf etdirməyi bir fürsət kimi dəyərləndirir”.

Politoloq Məhəmməd Əsədullazadə bunu TodayPress TV-yə açıqlamasında bildirib. 

Analitik vurğulayıb ki, Ermənistanın Baş naziri Nikol Paşinyan Azərbaycanla nəqliyyat və kommunikasiya xətlərinin açılmasında maraqlıdır və bu prosesin sürətlənməsi üçün addımlar atır. Onun sözlərinə görə, Ermənistan hazırda TRİPP layihəsini Azərbaycanla daha çevik əlaqələrin qurulması baxımından mühüm hesab edir və xüsusilə dəmir yolu nəqliyyatının inkişafına diqqət yetirir.  

Siyasi şərhçi xatırladıb ki, əvvəllər Nikol Paşinyan bu məsələlərə fərqli yanaşırdı, lakin indi yanaşmada ciddi dəyişiklik müşahidə olunur: 

“Ermənistan artıq Zəngəzur dəhlizinin açılmasında da maraqlıdır, çünki bu layihə ölkənin iqtisadi blokadadan çıxmasına, regional inteqrasiyaya qoşulmasına və dünyaya açılmasına şərait yarada bilər. Bu dəhliz Ermənistanın nəqliyyat qovşağına çevrilməsi ilə yanaşı, həmçinin ölkədə təhlükəsizliyin və sosial-iqtisadi rifahın artmasına da gətirib çıxara bilər”. 

M. Əsədullazadə əlavə edib ki, Ermənistan üçün bu proseslər geosiyasi baxımdan yeni imkanlar yaradır və ölkə Şərqlə Qərbi birləşdirən əsas nəqliyyat arteriyalarından birinin üzərində yerləşmək şansı əldə edir. Onun fikrincə, bu imkanları Ermənistana məhz Azərbaycan təqdim edir və buna görə də rəsmi İrəvan sülh prosesini sürətləndirməli, sülh müqaviləsinin imzalanmasına nail olmalı və ölkədə revanşist meyllərin aradan qaldırılması istiqamətində daha fəal addımlar atmalıdır. 

"Zəngəzur dəhlizi Ermənistanın sosial-iqtisadi inkişafı və regional inteqrasiyası üçün vacibdir və hazırda Ermənistan rəhbərliyi bu reallıqları anlayır, bunu bir fürsət kimi qiymətləndirir və Azərbaycanla sülhü təşviq edir”, - deyə o izah edib. 

Ekspert sonda bildirib ki, TRİPP layihəsi gələcəkdə Azərbaycan və Ermənistan arasında sülh körpüsünə çevrilə bilər. 

Qeyd edək ki, Paşinyan Azərbaycan üzərindən Ermənistana dəmir yolu yük daşınmasının artıq mümkün olduğunu və davam etdiyini açıqlayıb. O vurğulayıb ki, Gürcüstan üzərindən ixrac mümkün olaraq qalır, lakin strateji məqsəd TRIPP layihəsi çərçivəsində Azərbaycanla dəmir yolu xidmətini tam açmaqdır. 

Aysel Mətləb

TodayPress TV