Peşə-əmək Reabilitasiyası Mərkəzində “Açıq qapı” günü təşkil edildi

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin Əlilliyi olan Şəxslərin Peşə-əmək Reabilitasiyası Mərkəzində “Açıq qapı” günü keçirilib. 

Bu barədə TodayPress TV-yə ƏƏSMN-dən məlumat verilib.

Tədbirin məqsədi mərkəzdə göstərilən xidmətlər haqqında ictimaiyyəti məlumatlandırmaq, vətəndaşlarla birbaşa əlaqə yaratmaq və şəffaflığın artırılmasına dəstək vermək olub. 

Tədbirdə vətəndaşlar, o cümlədən KİV və qeyri-hökumət təşkilatlarının nümayəndələri iştirak ediblər. “Açıq qapı” günü çərçivəsində ziyarətçilərə mərkəzdə reallaşdırılan reabilitasiya prosesləri, təlim proqramları, peşə yönümlü məşğələlər və sosial adaptasiya tədbirləri haqqında ətraflı məlumat verilib.

İştirakçılar mərkəzdə müalicə və təlim alan şəxslərin gündəlik fəaliyyətlərini yaxından izləmək imkanı əldə ediblər. Əlilliyi olan şəxslərin müstəqil həyat bacarıqlarının artırılması və əmək bazarına inteqrasiyasını təmin edən layihələr və dəstək mexanizmləri barədə geniş məlumat verilib.