Ərdoğan Zəfər Günü paraddan DÜNYAYA MESAJ VERƏCƏK!

"Noyabrın 8-də Vətən müharibəsində qazanılan qələbənin 5-ci ildönümünə həsr olunmuş hərbi paradda qardaş Türkiyə Prezidenti Rəcəb Tayyib Ərdoğanın iştirak etməsi Azərbaycan və Türkiyənin birlikdə verəcəyi sülh, inteqrasiya və əməkdaşlıq mesajı olacaq".

Milli məclisin deputatı Hikmət Babaoğlu bunu TodayPress TV-yə açıqlamasında bildirib.

O vurğulayıb ki, Azərbaycanın əldə etdiyi tarixi Zəfər həm regional, həm də transregional miqyasda iqtisadi, sosial və mədəni əməkdaşlıq üçün geniş perspektivlər açıb:

"Zəfər paradı bir daha nümayiş etdirəcək ki, bu əməkdaşlıq və təhlükəsizliyi təmin edən güclü Azərbaycan Ordusu var. Qardaş Türkiyə isə hər zaman olduğu kimi Azərbaycanın yanındadır və regionda böyük sərmayələri, logistika imkanlarını, nəqliyyat marşrutlarının təhlükəsizliyini qorumağa hazırdır".

Millət vəkili sonda bildirib ki, bu tədbirdə veriləcək sülh mesajı qlobal informasiya məkanında da məhz bu məntiqlə qəbul olunacaq.

Qeyd edək ki, Bakıda noyabrın 8-də Zəfər Gününün beşinci ildönümü münasibətilə hərbi parad keçiriləcək.

Türkiyə Prezidenti Rəcəb Tayyib Ərdoğanın Zəfər paradında iştirak üçün Azərbaycana səfər etməsi gözlənilir. 

Aysel Mətləb