Bu sadə üsulu çoxları bilmir: Soyuducuya duz qoymağın faydası

Duz adətən yeməklərin hazırlanmasında istifadə olunsa da, onun məişətdə başqa faydaları da var. Soyuducudakı xoşagəlməz qoxunu azaltmaq üçün duzdan istifadə etmək də bu üsullardan biridir.

TodayPress TV xəbər verir ki, əvvəlcə soyuducuda qoxunun mənbəyini tapmaq lazımdır. Unudulmuş qida, tökülmüş maye və ya kəskin qoxulu məhsullar xoşagəlməz qoxuya səbəb ola bilər. Soyuducu təmizləndikdən sonra isə sadə duz üsulunu sınamaq mümkündür.

Bunun üçün kiçik, açıq qaba 2-3 xörək qaşığı xırda və ya iri duz töküb soyuducunun rəflərindən birinə yerləşdirmək kifayətdir. Duz nəm çəkmə xüsusiyyətinə malikdir və müəyyən şəraitdə ətrafdakı nəmi özünə çəkə bilər. Lakin onun bütün xoşagəlməz qoxuları aradan qaldıracağına zəmanət yoxdur.

Duz nəmləndikdə və ya çirkləndikdə dəyişdirilməlidir. Qabın aşmaması və duzun məhsulların üzərinə tökülməməsi də vacibdir.

Duzu birbaşa soyuducunun rəflərinə səpmək olmaz. Həmçinin onu dondurucudakı buzun üzərinə tökmək məsləhət görülmür. Duz kristalları cihazın boşluqlarına düşə və səthlərdə çöküntü yarada bilər.

Əgər soyuducuda qoxu uzun müddət qalırsa, məhsulların son istifadə tarixləri, çekmecələr, qabların altı və divarlara yaxın hissələr yoxlanılmalıdır. Xarabolmuş məhsullar və çirklənmələr təmizlənməli, soğan, pendir və hazır yeməklər kimi kəskin qoxulu məhsullar isə hava keçirməyən qablarda saxlanılmalıdır.

Soyuducuda mütəmadi olaraq su yığılırsa, cihaz düzgün soyutmursa və ya həddindən artıq buz bağlayırsa, problemin səbəbi texniki nasazlıq ola bilər. Bu halda duz problemi aradan qaldırmayacaq.

Kübra Musayeva