GoTürkiye’nin 10 seriyalı yeni mini-serialı “Bir İstanbul Hekayəsi” YouTube-da yayımlandı

GoTürkiye-nin yeni mini-serial layihəsi “Bir İstanbul Hekayəsi” artıq YouTube platformasında izləyicilərə təqdim olunub.

TodayPress TV xəbər verir ki, layihə İstanbulun müasir şəhər həyatı ilə yanaşı, Türkiyənin mədəni dəyərlərini beynəlxalq auditoriyaya tanıtmağı hədəfləyir.

Ay Yapım tərəfindən istehsal olunan və 10 seriyadan ibarət olan mini-serialda baş rolları Ozan Akbaba və Sinem Ünsal canlandırır. Serialda İstanbulun kosmopolit mühiti hadisələrin inkişafında mühüm rol oynayır.

Süjet eyni layihədə rol alan, lakin əvvəlcə münasibətləri gərgin olan Duru və Selim obrazları ətrafında qurulub. Hadisələrin gedişində personajlar arasında münasibətlər tədricən dəyişir. Şərqlə Qərbin qovuşduğu İstanbul isə serialın ümumi atmosferini formalaşdıran əsas məkan kimi çıxış edir.

Türkiyənin Turizmin Təbliği və İnkişafı Agentliyi (TGA) tərəfindən hazırlanan “Bir İstanbul Hekayəsi” İstanbulun estetik zənginliyini, mədəni müxtəlifliyini və çoxşaxəli ruhunu kino dili ilə təqdim edir. Serial Beyoğlu, Nişantaşı, Qalata Kuledibi, Boğaz sahili və Kireçburnu kimi şəhərin fərqli məkanlarında çəkilib. Bu məkanlar vasitəsilə İstanbulun keçmişlə müasir həyatın vəhdət təşkil etdiyi özünəməxsus ab-havası ekrana daşınıb.

Layihə beynəlxalq səviyyədə tanınan rejissor Hilal Saral ilə müasir hekayəçilik sahəsində yeni nəsil ssenaristlərdən olan Kemal Hamamcıoğlunu bir araya gətirir. Serial ssenarinin müasir yanaşması və rejissor işi ilə diqqət çəkir.

Layihənin əsas ideyası bir cümlədə ifadə olunur:

“Unudulmaz hekayələr hər yerdə yaşana bilməz.”

Hazırda YouTube platformasında yayımlanan “Bir İstanbul Hekayəsi” 2025-ci il Wanderlust Reader Travel Awards tərəfindən “Avropanın ən arzuolunan şəhəri” seçilən İstanbulun cəlbedici görüntülərini Duru və Selimin mərhələli şəkildə inkişaf edən hekayəsi ilə birləşdirir. Serial şəhərin özünəməxsus atmosferini süjet xətti ilə paralel şəkildə tamaşaçıya təqdim edir.

TodayPress TV