“Nə qədər məşqçi dəyişəcək?” – Ayxan Abbasov futbol sistemini tənqid etdi

Premyer Liqanın XXIV turunun “Sumqayıt” – “Şamaxı” oyunundan (0:1) sonra qonaq komandanın baş məşqçisi Ayxan Abbasov verdiyi açıqlamalarda yalnız oyun haqqında danışmayıb, həm də Azərbaycan futbolunda mövcud olan struktur problemlərinə toxunub.

O, komandasının inkişaf etdiyini, lakin büdcə və heyətin qorunması baxımından çətinliklərin olduğunu vurğulayıb. Abbasov bildirib ki, klub inkişaf etmək üçün stabil heyətə və daha böyük maliyyəyə ehtiyac duyur.

Eyni zamanda məşqçi Azərbaycan futbolunda yerli mütəxəssislərə münasibətin zəif olduğunu qeyd edib. Onun sözlərinə görə, klub rəhbərlərinin böyük hissəsi yerli məşqçilərə etibar etmir və tez-tez məşqçi dəyişiklikləri edir.

Abbasovun ən diqqət çəkən fikirlərindən biri isə bəzi klub rəhbərlərinin fəaliyyətini tənqid etməsi və onların dəyişməli olduğunu deməsidir. Bu açıqlama bir növ sistemdəki məsuliyyət bölgüsü problemini gündəmə gətirir.

Yerli məşqçilərə etimadın azlığı

Azərbaycan Premyer Liqasında çox vaxt nəticə olmayanda ilk dəyişdirilən şəxs baş məşqçi olur. Halbuki bir çox hallarda problemlər yanlış transfer siyasəti, qeyri-stabil büdcə və klub idarəetməsində planın olmaması kimi faktorlarla bağlı olur.

Yerli məşqçilər tez-tez qısa müddətli nəticə tələb olunan mühitdə işləməli olur və uzunmüddətli layihələr qurmaq çətinləşir.

Klub idarəçiliyi problemi

Ayxan Abbasovun “bir çox klub rəhbəri getməlidir” fikri Azərbaycan futbolunda tez-tez müzakirə olunan mövzudur. Burada problemlər, strategiyanın olmaması, qeyri-peşəkar transfer siyasəti və maliyyə planlaşdırmasının zəifliyi ilə bağlıdır. 

Nəticədə məşqçi dəyişsə də, sistem dəyişmədiyi üçün problemlər davam edir.

Maliyyə və heyətin qorunması

Mütəxəssis qeyd edir ki, yaxşı çıxış edən futbolçuları komandada saxlamaq çətindir. Bu isə daha böyük klubların və ya xarici liqaların maliyyə üstünlüyü ilə bağlıdır. Belə vəziyyətdə orta səviyyəli klublar hər mövsüm heyəti yenidən qurmalı olur. Nəticədə komanda stabilliyi pozulur.

Yerli məşqçilər arasında həmrəylik problemi

Ayxan Abbasov yerli mütəxəssislərin bir-birinə dəstək olmamasını da qeyd edir. Bu da peşəkar mühitin formalaşmasına mənfi təsir edən faktorlardan biridir.

Hörmətli cənablar, “Şamaxı” klubunun və Azərbaycan yığma komandasının baş məşqçisi Ayxan Abbasovun açıqlamaları təkcə bir oyundan sonra verilmiş emosional fikir deyil. Onun sözləri Azərbaycan futbolunda uzun müddətdir müzakirə olunan bir neçə əsas problemi üzə çıxarır. 

Bunlar klub idarəçiliyində sistemsizlik, məşqçilərin tez-tez dəyişdirilməsi, yerli mütəxəssislərə inamsızlıq, maliyyə və transfer siyasətində mövcud olan problemlərdir. 

Bu problemlər həll olunmasa, tək məşqçi dəyişiklikləri Azərbaycan futbolunun inkişafına ciddi təsir etməyəcək.

Namiq HUN