Azərbaycan komandası Sarayevodan medallarla döndü

Bosniya və Herseqovinanın paytaxtı Sarayevoda keçirilən Xüsusi Olimpiya Açıq Cüdo Turnirində Azərbaycan təmsilçiləri 4 medal qazanıblar.

TodayPress TV xəbər verir ki, yarışda Azərbaycan Cüdo Federasiyasının adaptiv cüdo qrupunun üzvlərindən Sadiq Nəzirov (G-2) gümüş, Adilə Niftaliyeva (G-24) və Yusif Nəsirli (G-7) isə bürünc medal əldə ediblər. Bu yarış hər üç idmançının ilk beynəlxalq turniri olub.

Azərbaycanın digər təmsilçisi Kamran Quliyev (G-10) isə bütün rəqiblərini məğlub edərək turnirin qalibi olub və qızıl medal qazanıb.

Beləliklə, Azərbaycan komandası Sarayevo turnirini 1 qızıl, 1 gümüş və 2 bürünc medalla başa vurub.

Qeyd edək ki, adaptiv cüdo xüsusi qayğıya ehtiyacı olan şəxslərin fərdi imkanları nəzərə alınmaqla cüdo ilə məşğul olmasına şərait yaradır. Bu idman növü eyni zamanda onların sosial inteqrasiyasına dəstək məqsədi daşıyır.