Xəstələri masada ölən həkimlərin SİYAHISI

Azərbaycanda estetik və plastik əməliyyatının qurban sayı az deyil. 

TodayPress TV araşdırmanı təqdim edir:

"Baku Medical Plaza", "Zəfəran Hospital" kimi tanınan klinikalarda işləyən İran əsilli Sirus Qoçqaninin adı bir neçə xəstəsinin ölümündə hallanır.

Onlar Leyla Oruclu (2017), Sona Gürgün Vəliyeva (2019) və Turanə Musazadədir (2020).

Qoçqaninin cərrahlıq ixtisası olmadığı, sadəcə tibb təhsili olduğu iddia edilir. Bu iddianı İran səfirliyi də təsdiqləyib və ona cinayət işləri açılıb. 

Digər həkim “Stimul Hospital” və digər klinikalarda fəaliyyət göstərən Elçin Zodandır (Zodanov).

O, 2018-ci ildə Yeganə Quliyevanın ölümünə səbəb olub. Belə ki, plastik əməliyyat zamanı əməliyyat başa çatmamış masada ölüb. Sabunçu rayon Prokurorluğunda cinayət işi açılıb. 

“MedEra” hospitalında bədən şəkilləndirmə əməliyyatı keçirən Aygün trombozdan vəfat edib. Onun həkimi cərrah Günel Bayramlı olub.

Ötən il aprelin 16-da 1984-cü il təvəllüdlü Səbirə Vəliyevanın cərrahi əməliyyatdan sonra ölməsi faktı üzrə cinayət işi başlanıb. Müəyyən olunub ki, “AzE Estetik Mərkəz” MMC-nin direktoru Ülviyyə İlyasova aprelin 15-də qaynı arvadı Səbirə Vəliyevanın üzərinə liposaksiya əməliyyatı icra edib, daha sonra yaşadığı evə apararaq həkim nəzarətindən kənar saxlayıb.

Növbəti gün Səbirə Vəliyeva kəskin qanaxmadan həyatını itirib.

Ülviyyə İlyasovaya Cinayət Məcəlləsinin 143 (təhlükədə qoyma) və 314.2-ci (ehtiyatsızlıqdan zərərçəkmiş şəxsin ölümünə səbəb olan səhlənkarlıq) maddələri ilə ittiham elan edilib. Barəsində polis nəzarəti altına vermə qətimkan tədbiri seçilib.

Topçubaşov adına Elmi-Cərrahiyyə Mərkəzində həkimlərin adı açıqlanmasa da, 2012-ci ildə bir həftə ərzində 3 xəstə - Nübar Quliyeva, Kərim Hümbətov, Südabə Ağammədova əməliyyat masasında ölüb.

Qeyd edək ki, tibbi səhlənkarlığa görə CM-nin 314-cü maddəsi (ehtiyatsızlıqdan ölümə səbəb olma) ilə məsuliyyət nəzərdə tutulur (2-7 ilədək azadlıqdan məhrumetmə). 

Türkan İsgəndərli

TodayPress TV