Deputat: "Bu, sadəcə pul deyil, vicdan məsələsidir"

Minatəmizləmə fəaliyyətini həyata keçirən zaman partlayıcı sursatların işə düşməsi nəticəsində baş verən bədbəxt hadisə ilə əlaqədar həlak olan və ya bu zaman aldığı xəsarətdən həyatını itirən minatəmizləyənlərin ailə üzvlərinə Azərbaycan Prezidentinin təqaüdü təsis edilib.

Fərmanla təqaüdün aylıq məbləği 700 manat müəyyən edilib. 

Bu barədə TodayPress TV-yə danışan Milli Məclisin deputatı Elnarə Akimova bildirib ki,  bu qərar sosial təminat addımı olmaqla yanaşı, həm də vicdanın və dövlət məsuliyyətinin ifadəsidir: 

"Minatəmizləyənlər görünməyən təhlükənin qarşısında dayanaraq torpağı həyata qaytaran insanlardır. Onların hər addımı risk, hər nəfəsi təhlükə ilə üz-üzədir. Bu yolda həyatını itirənlər isə artıq yalnız bir ailənin deyil, bütöv bir xalqın ağrısıdır. Əlbəttə, 700 manatlıq təqaüd heç bir halda itirilmiş canın əvəzini vermir. Amma bu addım göstərir ki, o itki unudulmur, o fədakarlıq dəyərləndirilir. Dövlətin bu məsuliyyəti öz üzərinə götürməsi, şəhid olan minatəmizləyənlərin ailələrinə sahib çıxması həm mənəvi, həm də sosial baxımdan vacibdir". 

O bildirib ki, bu qərar  cəmiyyətə bir mesaj verir: təhlükə ilə üz-üzə qalan insan tək deyil. Onun arxasında dövlət var və bu, gələcək üçün də bir güvən hissi yaradır.

"Eyni zamanda, bu cür itkilərin minimuma endirilməsi üçün daha güclü texnologiyaların tətbiqi, beynəlxalq əməkdaşlığın genişləndirilməsi və təhlükəsizlik tədbirlərinin daha da sərtləşdirilməsi də əsas prioritet olmalıdır. Çünki ən böyük məqsəd təqaüd vermək deyil, insanları qorumaqdır", - parlamentari fikrini tamamlayıb.    

Jalə Rövşən

TodayPress TV