Günəş partlayışları necə başlayıb?
Alimlər müəyyən ediblər ki, günəş partlayışları tək bir ani partlayışla deyil, bir-birini gücləndirən zəif pozuntular zənciri nəticəsində yaranır.
TodayPress TV xəbər verir ki, bu nəticə Avropa Kosmik Agentliyinin Solar Orbiter zondundan əldə olunan məlumatların təhlili əsasında əldə edilib.
Müşahidələr Günəşə nadir dərəcədə yaxın uçuş zamanı aparılıb. Solar Orbiter alimlərə güclü bir günəş partlayışını onun ən yüksək nöqtəsindən təxminən 40 dəqiqə əvvəl izləməyə imkan verib. Bu müddətdə maqnit strukturlarının tədricən yığıldığı və Günəş tacında açıldığı müşahidə olunub.
Araşdırmaya görə, Günəş atmosferində əvvəlcə isti plazmanı saxlayan nazik maqnit strukturları formalaşır. Bu strukturlar qeyri-sabit olur, maqnit sahələri parçalanır və yenidən birləşir. Hər belə proses enerji buraxır və növbəti prosesi tetikləyir. Nəticədə zəif hadisələr sürətlə güclü alovlanmaya çevrilir.
Alimlər həmçinin "plazma yağışı" adlı fenomeni qeydə alıblar. Bu zaman isti plazma axınları Günəş atmosferindən aşağı doğru hərəkət edir. Rentgen müşahidələri göstərib ki, hissəciklər işıq sürətinin 40-50 faizi qədər sürətlənə bilir ki, bu da kosmik aparat və astronavtlar üçün təhlükə yarada bilər.
Tədqiqatçılar bildirirlər ki, bu kəşf günəş enerjisinin necə sərbəst buraxıldığını daha yaxşı anlamağa və kosmik hava proqnozlarını dəqiqləşdirməyə kömək edəcək. Alimlər gələcəkdə bu mexanizmin digər aktiv ulduzlarda da mövcud olduğunu sübut etməyi planlaşdırırlar.
Türkan İsgəndərli
