"Samsung" "One UI" interfeysini tətbiq edəcək

“Samsung” şirkəti "Wi-Fi" dəstəyi və daxili ekranlarla təchiz olunmuş ağıllı soyuducu, paltaryuyan kimi məişət texnikasına “One UI” interfeysini gətirməyi planlaşdırır.

TodayPress TV xəbər verir ki, bu barədə məlumat istehsalçının rəsmi saytında yer alıb.

Şirkətin açıqlamasına görə, təşəbbüs bütün “Samsung” ekosistemində vahid interfeys yaratmağa yönəlib. İstifadəçilər bundan sonra smartfon və televizorlarda olduğu kimi eyni vizual mühiti məişət texnikasında da görəcək, həmçinin məşhur tətbiq və xidmətlərlə inteqrasiya imkanına sahib olacaqlar.

İstehsalçı bildirib ki, yeni strategiya genişləndirilmiş proqram təminatı dəstəyi ilə müşayiət olunacaq. Belə ki, 2024-cü ildən bazara çıxarılan “Samsung” məişət texnikası yeddi il ərzində yeniləmələr alacaq – bu müddət brendin flaqman smartfonları ilə eynidir. İlk yeniliklərin sentyabr 2025-dən etibarən istifadəyə veriləcəyi qeyd olunub.

Mütəxəssislər bildirirlər ki, bu addım məişət texnikası istehsalçıları arasında yenilikdir. Adətən belə cihazlar yalnız bir neçə dəfə proqram təminatı yeniləməsi ilə kifayətlənir.

Qiymət Mahir