“Microsoft” SİM-lə işləyən noutbuk təqdim etdi

“Microsoft” şirkəti “5G” SİM kart dəstəyi ilə işləyən “Surface” noutbukunu təqdim edib. 

TodayPress TV xəbər verir ki, bu barədə “FoneArena” məlumat yayıb. 

Bildirilib ki, “Microsoft" ikinci nəsil “Intel Core Ultra” prosessoru, “NanoSIM” və “eSIM” dəstəyi ilə quraşdırılmış “5G” modemi və təkmil naviqasiya sistemi ilə “Surface Laptop 5G”ni təqdim edib. 

Modelin əsas xüsusiyyəti noutbukun mövqeyindən və ətrafdakı şəraitdən asılı olaraq əlaqə keyfiyyətini avtomatik optimallaşdıran 6 antenadan ibarət intellektual sistemdir.  

“Microsoft”un açıqlamasına görə, texnologiya qeyri-sabit siqnal şəraitində belə sabit əlaqə təmin edir.  

Bundan əlavə, “Surface Laptop 5G” “5G” siqnalını digər cihazlar arasında paylayaraq mobil qaynar nöqtə kimi işləyə bilər. 

Noutbuk 2304x1536 piksel təsvir ölçülü 13,8 düymlük “AMOLED” sensor ekran, 120 Hz yeniləmə tezliyi, “HDR”, “Dolby Vision IQ” və “Adaptive Color” dəstəyi ilə təchiz edilib. Həmçinin, süni intellekt funksiyaları ilə quraşdırılmış “Full HD Surface Studio” kamerası video zənglər və konfranslar üçün nəzərdə tutulub. 

Qeyd edək ki, “Surface Laptop 5G” 16GB və ya 32GB "LPDDR5X" RAM və 1TB-a qədər "SSD" yaddaşı ilə satışa çıxarılacaq.  

“Intel Core Ultra 5”, 16 GB RAM və 256 GB SSD ilə baza konfiqurasiyası 1800 dollara, “Core Ultra 7” prosessoru, 32 GB operativ yaddaş və 1 TB yaddaşa malik top versiya isə 2700 dollara başa gələcək. 

Aysel Mətləb