Məzunlar iş axtarmalı, yoxsa iş qurmalıdırlar?

Elm və təhsil nazirinin müavini Firudin Qurbanovun "məzun iş axtarmalı deyil, iş yeri açmalıdır" fikri müzakirələrə səbəb olub. 

Məsələyə münasibət bildirən təhsil eksperti Elçin Əfəndi TodayPress TV-yə bildirib ki, bu yanaşma günün reallıqlarından irəli gəlir və ali təhsil sisteminin qarşısında duran əsas vəzifələrlə bağlıdır.

Onun sözlərinə görə, ali təhsil müəssisələrində kadr hazırlığı elə qurulmalıdır ki, tələbələr yalnız iş axtaran tərəf kimi deyil, eyni zamanda ideya irəli sürən, layihə hazırlayan və həmin ideyaları gəlirə çevirə bilən mütəxəssis kimi formalaşsınlar:

"Məqsəd odur ki, məzun universiteti bitirdikdən sonra iş axtarmaq məcburiyyətində qalmasın, əksinə ixtisasına uyğun qurumlar onun əmək fəaliyyətinə cəlb olunmasında maraqlı olsunlar. Bu fikir hər bir məzunun mütləq biznes qurmalı olduğu anlamına gəlmir. Xüsusi təyinatlı ali təhsil müəssisələrinin məzunları təhsil aldıqları qurumlarda birbaşa əmək fəaliyyətinə başlaya bilsələr də, mülki ali məktəblərin məzunları əmək bazarının tələblərinə uyğun, güclü ixtisaslı kadr kimi yetişdirilməlidirlər ki, ya dərhal iş tapa, ya da işəgötürənlərin diqqətini cəlb edə bilsinlər".

Ekspert əlavə bildirib ki, hazırda süni zəka və informasiya texnologiyalarının sürətlə inkişaf etdiyi dövrdə şəxslər öz layihə və təqdimatları vasitəsilə iş qurmaq və ya şirkətlərin marağını qazanaraq işə qəbul olunmaq imkanı əldə edə bilərlər:

"Açıqlamanın məntiqi də məhz buna əsaslanır. Maddi vəziyyəti aşağı olan və özünü kifayət qədər inkişaf etdirə bilməyən tələbələr üçün də iş məsələsində bu amillər nəzərə alınmalıdır. Bu o demək deyil ki, ali təhsil müəssisəsini bitirən hər bir şəxs mütləq şəkildə öz biznesini qurmalı və ya dərhal vakant vəzifəyə qəbul olunmalıdır. Belə bir tələb yoxdur".

Təcrübə məsələsinə gəldikdə isə, Elçin Əfəndi xatırladıb ki, ölkə başçısının yaxın vaxtlarda imzaladığı sərəncama əsasən, tələbələrin təcrübə müddəti əmək fəaliyyəti kimi qeydiyyata alınacaq. O, tələbələrin ən azı üçüncü kursun ikinci semestrindən və ya dördüncü kursdan başlayaraq ixtisasları üzrə minimum bir il müddətində təcrübəyə cəlb olunmasını təklif etdiklərini bildirib:

"Bu halda işəgötürən qurumlar məzunlardan əlavə iş təcrübəsi tələb etməyəcək, çünki onlar artıq ixtisas üzrə təcrübə qazanmış hesab olunacaqlar. Ümid edirik ki, qarşıdakı illərdə bu məsələyə də tam aydınlıq gətiriləcək".   

Türkan İsgəndərli