Bahar Muradova Milli Mətbuat Günü münasibətilə paylaşım etdi
Azərbaycan Respublikasının Ailə, Qadın və Uşaq Problemləri üzrə Dövlət Komitəsi sədri Bahar Muradova 22 İyul – Milli Mətbuat Günü münasibətilə media nümayəndələrini təbrik edib.
TodayPress TV xəbər verir ki, təbrikdə deyilir:
"Hörmətli jurnalistlər, media nümayəndələri!
Sizi 22 İyul – Milli Mətbuat Günü münasibətilə səmimi-qəlbdən təbrik edir, milli jurnalistikamızın inkişafında əvəzsiz rol oynayan bütün media əhlinə möhkəm cansağlığı, peşəkar fəaliyyətinizdə uğurlar və davamlı ilham arzulayıram!
Azərbaycan mətbuatı 1875-ci ildə Həsən bəy Zərdabinin yaratdığı “Əkinçi” qəzeti ilə milli oyanışın, maarifçiliyin və xalqla səmimi dialoqun təməlini qoymuşdur.
Bu gün isə mətbuatımız çağdaş dövrün tələblərinə cavab verən güclü informasiya institutuna çevrilərək həm milli kimliyin, həm də müasirliyin təbliğində və qorunmasında əvəzsiz rol oynayır.
Media nümayəndələri xalqımızın müqəddəs dəyərlərinin, milli-mənəvi irsinin, ailə institutunun və dövlətçilik prinsiplərinin qorunması naminə ön cəbhədə çalışan fikir əsgərləridir.
Xüsusilə də ailə dəyərlərinin möhkəmləndirilməsi, gənclərin sağlam ruhda formalaşması və ənənəvi identikliyimizin yaşadılması istiqamətində media üzərinə böyük məsuliyyət düşür.
Dövlətimizin bu sahəyə verdiyi yüksək önəm Prezident İlham Əliyevin rəhbərliyi ilə ailə institutunun gücləndirilməsi və dəyərlərimizin təbliği istiqamətində həyata keçirilən ardıcıl siyasətdə də aydın şəkildə öz əksini tapır.
Mətbuat həm də milli maraqlarımızın qorunmasında, informasiya təhlükəsizliyinin təminində və ictimai-siyasi proseslərin balanslı şəkildə işıqlandırılmasında mühüm vasitədir.
44 günlük Vətən müharibəsi dövründə və ondan sonrakı mərhələdə Azərbaycan mediası öz peşəkarlığı və milli mövqeyi ilə cəmiyyətin etimadını qazanmışdır.
Ənənəyə sadiq qalaraq bu il də Prezident İlham Əliyev media nümayəndələrinin bir qismini orden və medallarla təltif etmişdir.
Bu sərəncam, dövlət başçısının milli mətbuata göstərdiyi diqqət və etimadın parlaq təzahürüdür. Bu həm də jurnalistikanın cəmiyyət üçün necə dəyərli və zəruri bir sahə olduğunun dövlət səviyyəsində təsdiqidir.
Gələcəkdə də Azərbaycan mediasının əsas vəzifələri – qlobal informasiya axınında milli mövqeləri qorumaq, milli-mənəvi dəyərləri yaşatmaq, vətəndaş cəmiyyətinin formalaşmasına dəstək vermək və beynəlxalq informasiya məkanında ölkəmizin həqiqətlərini dünyaya çatdırmaq olacaqdır.
Bir daha sizi bu əlamətdar gün münasibətilə təbrik edir, Vətənə, dövlətə və cəmiyyətə xidmət yolunda möhkəm iradə, peşə fəaliyyətinizdə daimi uğurlar arzulayıram!
Milli Mətbuat Gününüz mübarək olsun!".
