Meksika səfiri: Bakıdan öyrənib gedirik
“Bu gündən etibarən Meksikanı WUF14-ə aparan yol başlayır və məqsədimiz növbəti forumu da Bakıdakı kimi uğurlu keçirməkdir”.
TodayPress TV xəbər verir ki, bunu Meksikanın Azərbaycandakı fövqəladə və səlahiyyətli səfiri Maria Viktoriya Romero Kabalyero WUF13-ün rəsmi bağlanış mətbuat konfransında çıxışı zamanı deyib.
O, Azərbaycana göstərilən dəstəyə, qonaqpərvərliyə və forumun uğurla keçirilməsinə verdiyi töhfəyə görə təşəkkür edib.
Maria Viktoriya Romero Kabalyero bildirib ki, forum çərçivəsində Azərbaycan xalqının, xüsusilə də gənclərin qonaqpərvərliyinin bir daha şahidi olublar.
Səfir qeyd edib ki, gənc azərbaycanlı qadın və kişilər iştirakçılara istiqamət göstərib, fikir mübadiləsinə şərait yaradıb və Meksika nümayəndə heyəti üçün bu təcrübə xüsusi əhəmiyyət daşıyıb.
O, forumun təşkilində iştirak edən könüllülərə xüsusi təşəkkürünü ifadə edib.
“Gənc könüllülərə xüsusi təşəkkür edirəm. Sizə çox təşəkkür edirik”, – deyə o bildirib.
Maria Viktoriya Romero Kabalyero, həmçinin “UN-Habitat”a təşəkkür edərək forumda mənalı iştirakın təmin olunmasında təşkilatın rolunu qeyd edib.
“WUF13-ün əhəmiyyəti Meksika nümayəndə heyətinin yüksək səviyyəli tərkibində də öz əksini tapdı. Nümayəndə heyətində şəhərsalma naziri, Mexiko şəhərinin qubernatoru, “UN-Habitat” üzrə nazir müavini və hökumətin müxtəlif səviyyələrindən olan çoxsaylı nümayəndələr yer alıb. Bu günün ardından Meksika WUF14-ə hazırlıq mərhələsinə başlayır. Nümayəndə heyəti forumdan əldə olunan təcrübə və tapşırıqları özü ilə Meksikaya aparır və növbəti forumun Bakıdakı kimi uğurlu keçirilməsi öhdəliyini daşıyır”.
Səfir əlavə edib ki, Mexiko şəhərinin hökuməti “UN-Habitat” ilə birlikdə WUF14 üçün idarəetmə modellərinin, strateji istiqamətlərin və təşkilati çərçivələrin hazırlanmasına başlayacaq.
Onun sözlərinə görə, bu proses bütün maraqlı tərəflərlə əməkdaşlıq şəraitində həyata keçiriləcək.
Maria Viktoriya Romero Kabalyero qeyd edib ki, WUF14 14 ildən sonra yenidən Latın Amerikasına qayıdır.
O bildirib ki, regionda son forum Kolumbiyanın Medellin şəhərində keçirilib və qarşıdakı sessiyanın əlavə məsuliyyəti ondan ibarətdir ki, bu, 2030-cu ilə qədər keçiriləcək son Ümumdünya Şəhərsalma Forumu olacaq.
Səfir çıxışını belə yekunlaşdırıb:
“Əziz dostlar, Meksikada görüşərik. Bizim Meksikada bir məşhur ifadəmiz var — Mi casa es tu casa — yəni “Mənim evim sizin evinizdir”.
Qiymət Mahir
