Yamal dünya çempionatı öncəsi rəqiblərə mesaj göndərdi
Lamin Yamal DÇ-2026 öncəsi İspaniya yığma komandası üçün favorit statusu barədə danışıb.
TodayPress TV xəbər verir ki, bu barədə FIFA-nın rəsmi saytı məlumat yayıb.
Gənc yarımmüdafiəçi favorit olmağın komandaya əlavə üstünlük vermədiyini deyib:
“Bu maraqlıdır, çünki Avropa çempionatında vəziyyət tam fərqli idi. Heç kim bizi əsas favorit hesab etmirdi və bu, bizə kömək etdi. Favorit olmaq meydanda heç nə ifadə etmir. Bu, sənə üstünlük qazandırmır və daha çox qol vurmağa kömək etmir”.
İspan futbolçu dünya çempionatında bir çox güclü yığmanın mübarizə aparacağını vurğulayıb:
“Argentina, Fransa, Portuqaliya, İngiltərə kimi komandalar var və onların hamısı mundialda ən yaxşı oyununu göstərir. Bizim üçün əsas məsələ İspaniya uğrunda sonadək mübarizə aparmaq və oyun üslubumuza inanmaqdır. Məncə, ən yaxşı futbolu biz oynayırıq”.
Qeyd edək ki, İspaniya millisi son illərdə həm Avropa çempionatı, həm də UEFA Millətlər Liqasında uğurlu çıxışı ilə diqqət çəkib.
Namiq HUN
