Qlok Ferstappeni idman əfsanələri ilə müqayisə etdi
Keçmiş “Formula-1” pilotu Timo Qlok dördqat dünya çempionu Maks Ferstappen haqqında yüksək fikirlər səsləndirib.
TodayPress TV xəbər verir ki, bu barədə “RacingNews365” məlumat yayıb.
Almaniyalı sabiq pilot niderlandlı sürücünü Rafael Nadal, Rocer Federer, Novak Cokoviç və Mixael Şumaxer kimi idman əfsanələri ilə müqayisə edib.
Qlok bildirib ki, Ferstappen “Formula-1”də tətbiq olunan bəzi qaydaları açıq şəkildə tənqid etməkdən çəkinmir:
“Maksa görə döngəni daha yavaş keçib sonda üstünlük qazanmaq “Formula-1”in ruhuna uyğun deyil. O, düşündüyünü hər zaman açıq deyir və məhz bu xüsusiyyət onu fərqləndirir”.
Sabiq pilot Ferstappenin simulyator yarışlarına olan həvəsindən də danışıb. Onun sözlərinə görə, Maks bir neçə il əvvəl İmolada “Formula-1” mərhələsi zamanı gecə saatlarında 24 saatlıq simulyator yarışında iştirak edib və ertəsi gün əsas yarışı qazanıb.
Qlok qeyd edib ki, Ferstappen uğur qazanmaq üçün daim öz üzərində işləyir:
“Bu insanlar - Nadal, Federer, Cokoviç, Şumaxer - hamısı daha yaxşı olmaq üçün inanılmaz zəhmət çəkiblər. Maks da məhz belədir. O, trası daha yaxşı anlamaq üçün minlərlə dövrə simulyatorda sürür”.
Qlok həmçinin bildirilib ki, Ferstappen “Nürburqrinq” trasında lisenziya testləri zamanı hər döngə və hava şəraiti barədə detallı suallar verərək mütəxəssisləri heyrətləndirib.
Namiq HUN
