Şagirdlər peşə, yoxsa universitet seçməlidir? - AÇIQLAMA
Son illərdə ölkədə peşə təhsili sahəsində diqqətçəkən inkişaf müşahidə olunur. Müasir ixtisasların açılması, yeni emalatxanaların yaradılması və tələbələrə praktiki bacarıqların aşılanması bu sahəyə marağı xeyli artırıb. Artıq bir çox şagird yalnız universitet deyil, peşə təhsili istiqamətini də ciddi alternativ kimi nəzərdən keçirir.
Mövzu ilə bağlı TodayPress TV-yə danışan təhsil eksperti Rizvan Fikrətoğlu bildirib ki, bu məsələni emosional deyil, rasional yanaşma ilə qiymətləndirmək lazımdır:
"Bu gün əmək bazarının tələbləri dəyişib. Artıq yalnız diplom kifayət etmir. Bacarıq, peşəkarlıq və praktiki təcrübə daha ön plana çıxır. Peşə təhsili də məhz bu boşluğu doldurur".
Onun sözlərinə görə, seçim edərkən ilk növbədə şagird öz maraq və qabiliyyətlərini düzgün analiz etməlidir:
"Əgər şagird konkret bir sahədə tez bir zamanda peşə yiyəsi olmaq, işləmək və gəlir əldə etmək istəyirsə, peşə təhsili daha uyğun seçimdir. Amma elmi fəaliyyət, akademik inkişaf və müəyyən ixtisaslar üzrə dərin bilik tələb olunursa, universitet təhsili vacibdir".
Ekspert əlavə edib ki, bu iki istiqaməti bir-birinə qarşı qoymaq düzgün deyil. O qeyd edib ki, peşə təhsili universitetə alternativ deyil, tamamlayıcıdır. Ən düzgün yanaşma fərdi potensiala uyğun qərar verməkdir.
Türkan İsgəndərli
