Həyatlarını yenidən qurmağa çalışarlar, yenidən evsiz qalırlar — Livan böhranı…
“Qısa müddətdə təkrarlanan köçlər şəhər sistemlərinə ağır yük yaradır”.
TodayPress TV xəbər verir ki, bunu WUF13 çərçivəsində keçirilən “Yaxın Şərq böhranı və onun qlobal mənzil və şəhərsalma sahəsinə təsirləri” adlı tədbirdə BMT-nin İnkişaf Proqramının (BMTİP) təmsilçisi Fransin Pikap deyib.
O bildirib ki, Livanda son gərginlik böyükmiqyaslı məcburi köçkünlüyə səbəb olub.
“Qısa müddət ərzində 800 mindən çox insan məcburi köçkünə çevrilib. Onların bir çoxu yalnız 2024-cü il münaqişəsindən sonra həyatlarını yenidən qurmağa başlamışdı”, – deyə o vurğulayıb.
Fransin Pikap qeyd edib ki, ardıcıl evakuasiya çağırışları insanları qısa müddətdə bir neçə dəfə yer dəyişməyə məcbur edir.
Onun sözlərinə görə, yaşayış evlərinə və əsas xidmətlərə dəyən ziyan onsuz da kövrək vəziyyətdə olan şəhər sistemləri və məcburi köçkünləri qəbul edən icmalar üzərində ciddi təzyiq yaradır.
BMTİP təmsilçisi bildirib ki, təşkilat Livanda böhrana cavab tədbirləri, bərpa və yenidənqurma prosesinə dəstək göstərir.
Bu dəstəyə milli koordinasiya, təcili sığınacaq təminatı, məşğulluq proqramları, real vaxt məlumat sistemləri, iqtisadi təhlillər və idarəetmə sahəsində yardım daxildir.
Fransin Pikap əlavə edib ki, BMTİP İraqda idarəetməyə dəstək, İordaniyada isə hazırlıq və dayanıqlılıq proqramları həyata keçirir.
Qiymət Mahir
