Anaklaudia Rossbax Azərbaycana təşəkkür etdi
“WUF13 şəhərlərin gələcəyi naminə kollektiv fəaliyyət üçün həqiqətən qlobal platforma olduğunu bir daha nümayiş etdirdi”.
TodayPress TV xəbər verir ki, bunu BMT-nin Məskunlaşma Proqramının (UN-Habitat) İcraçı direktoru Anaklaudia Rossbax WUF13-ün rəsmi bağlanış mətbuat konfransında çıxışı zamanı deyib.
O, Ümumdünya Şəhərsalma Forumunun 13-cü sessiyasının yüksək səviyyədə təşkilinə, göstərilən qonaqpərvərliyə və liderliyə görə Azərbaycana təşəkkür edib.
“Tədbirin təşkilində göstərilən öhdəlik və səylər WUF13-ü şəhərlərin gələcəyi ilə bağlı kritik bir dövrdə həqiqətən qlobal toplantıya çevirib. Forumda iştirak edən bütün hökumətlərə, şəhərlərə, tərəfdaşlara, ekspertlərə, vətəndaş cəmiyyətinə, gənclərə və icmalara təşəkkür edirəm. WUF13 bir daha göstərdi ki, Ümumdünya Şəhərsalma Forumu şəhərlərin gələcəyi naminə kollektiv fəaliyyət üçün qlobal platformadır. Forum proqramı boyunca yüksək iştirak və fəallıq müşahidə olundu. Forumda 176-dan çox ölkədən ümumilikdə 57 mindən artıq iştirakçı yer aldı, onlardan 3 mindən çoxu tədbirə onlayn qoşuldu”.
“UN-Habitat” rəhbərinin sözlərinə görə, “Urban Expo” üzrə 100 mindən çox ziyarət qeydə alınıb və iştirakçıların 55 faizini qadınlar və qızlar təşkil edib.
O əlavə edib ki, forum çərçivəsində 11 dövlət başçısı, 9 yüksək səviyyəli qonaq, 88 nazir, 76 nazir müavini və 130 mer iştirak edib.
Anaklaudia Rossbax bildirib ki, ümumilikdə 579 sessiya keçirilib.
Onun sözlərinə görə, “Urban Expo” çərçivəsində 260 sərgi iştirakçısı, innovator və həll təqdimatçısı fəaliyyət göstərib və sərgiyə 74 mindən çox ziyarət qeydə alınıb.
“UN-Habitat” rəhbəri qeyd edib ki, forum həftəsi boyunca 865 media nümayəndəsi tədbiri işıqlandırıb. Bu rəqəmlər şəhərlərlə bağlı problemlərin aktuallığını nümayiş etdirir.
“Şəhərlər həll yolları tələb edir və tərəfdaşlar buna cavab verir. WUF13-ün “Dünyaya mənzil: təhlükəsiz və dayanıqlı şəhərlər və icmalar” mövzusu indiki dövrdə xüsusilə aktualdır. Forum qlobal mənzil böhranının görünməmiş miqyasa çatdığı bir dövrdə keçirildi”.
Qiymət Mahir
