“Venesuelada çevriliş, Ukraynada...” — Tramp görüşə HAZIRLAŞIR!

ABŞ Prezidenti Donald Tramp oktyabrın 16-da verdiyi açıqlamada Rusiya Prezidenti Vladimir Putinlə Macarıstanın paytaxtı Budapeştdə görüşəcəyini bildirdi. 

Bir müddət sonra isə görüşün keçirilməyəcəyi ilə bağlı məlumatlar yayıldı. Ağ Evdə çıxış edən ABŞ Prezidenti Donald Tramp rusiyalı həmkarı Vladimir Putinlə Ukraynadakı müharibə ilə bağlı üzbəüz danışıqlar planının təxirə salınmasından sonra “vaxtını itirmək istəmədiyini” bildirdi. 

Görüşün ləğv olunmasına səbəb nə idi? 

Sosial Tədqiqatlar Mərkəzinin Media və Kommunikasiya Departamentinin rəhbəri, siyasi məsələlər üzrə ekspert Əziz Əlibəyli mövzu ilə bağlı TodayPress TV-yə danışarkən deyib ki, bu proseslər, əslində, danışıqların baş tutmaması yönündə idarə olunur.

Dünya mediası gözləyir ki, tərəflər bir araya gələcək, eyni platformada fikir mübadiləsi aparacaqlar. Lakin bu məsələlərdən öncə daha böyük problemlər var:

“Danışıqlarla bağlı müzakirələrin təşkil olunması, əslində, tərəflərin bir-birini günahlandırması üçün arqument toplamaq məqsədi daşıyır. Məsələn, Rusiya deyir ki, “Rosneft” və “Lukoyl” kimi şirkətlərə qarşı sanksiyalar tətbiq etməyə ehtiyac yox idi. ABŞ tərəfi isə əksini deyir — onların fikrincə, Vaşinqton sülh üçün dəfələrlə təşəbbüs göstərib, lakin Kreml müharibəni uzatmaqla daha dağıdıcı mərhələyə keçib”.

Analitik məsələdə diqqət çəkən üç strateji detalı izah edib:

“Oktyabrın 31-də Donald Tramp ilə Çin Xalq Respublikasının Sədri Si Cinpin arasında görüş planlaşdırılır. Bu görüş öncəsi ABŞ bir çox cəbhədə güc faktorundan istifadə edib Si Cinpinin qarşısına “dünyanın ən güclü dövləti” kimi çıxmalıdır.  Mümkündür ki, həmin tarixə qədər Venesuelada dövlət çevrilişinin şahidi olaq. Çünki ABŞ Latın Amerikası üzərində dominantlığını təsdiq etmək istəyir. ABŞ, həmçinin Çinin Latın Amerikasındakı investisiyalarına qarşı savaş açır.

İkincisi, Yaxın Şərqdə sürətli, sağlam nəticə əldə etmədən HƏMAS-la bəlli çərçivə inşa etdilər. Bunun necə nəticələnəcəyi hələlik qeyri-müəyyəndir. Əsas məqsəd “biz addım atdıq” görüntüsü yaratmaqdır.

Üçüncü istiqamət isə Rusiya–Ukrayna cəbhəsidir. ABŞ 31 oktyabra qədər Ukraynanın hərbi sahədə ciddi üstünlük qazanmasını istəyir. Son bir həftə ərzində Kiyevə yardımlar intensiv şəkildə göndərilir. Diqqət etsək, Ukrayna ordusunun son günlərdə həyata keçirdiyi əməliyyatların miqyası və xarakteri dəyişib — bu, təsadüfi deyil”.

Ə.Əlibəylinin qənaətincə, Vaşinqton Rusiyanı Çin–ABŞ münasibətlərindən kənarda saxlamağa çalışır. Onun sözlərinə görə, Vaşinqton danışıqların dərhal baş tutmasında maraqlı deyil. Çünki Rusiya hələ məğlubiyyətini etiraf etməyib:

“Belə olan halda, ABŞ alternativ variant kimi müharibənin 31 oktyabra qədər daha kəskin mərhələdə davam etdirilməsini istəyir. Düşünürlər ki, Rusiya vacib həmlələrlə çökə bilər”,

Qiymət Mahir

TodayPress TV