1 həftədə Ermənistan mediası: Nələr müzakirə edilir?

Bu həftə Ermənistan mediası ənənəvi olaraq daxili siyasətə, xüsusilə də iyunda keçiriləcək parlament seçkilərinə hazırlığa fokuslanıb. Hakim “Mülki Müqavilə” partiyasının proqramı, müxalifətin reaksiyası və seçki öncəsi gərginliklər əsas müzakirə mövzularından olub. Eyni zamanda dövlət-kilsə qarşıdurması, Paşinyanın Rusiya ilə münasibətləri və iqtisadi dəstək tədbirləri də geniş yer alıb.

Ən çox diqqət çəkən məsələlərdən biri Ana Kilsənin (Müqəddəs Eçmiədzin) hakim partiyanın proqramına kəskin reaksiyasıdır. Kilsə rəhbərliyi “Mülki Müqavilə”nin kilsə nizamnaməsini dəyişdirmək, Katolikosun səlahiyyətlərini məhdudlaşdırmaq və yeni seçki mexanizmləri təklif etmək kimi addımlarını “konstitusiyaya zidd” və “milli dəyərlərə zərbə” kimi qiymətləndirib. Bu mövzu media və ictimai rəydə böyük rezonans doğurub. 

Seçki hazırlığı ilə yanaşı, martın sonlarında Müqəddəs Anna kilsəsində baş verən insident də hələ də gündəmdədir. Baş nazir Nikol Paşinyanın çıxışı zamanı gənc David Minasyan və qardaşının iştirakı ilə yaranan qarşıdurma nəticəsində Minasyan 2 aylıq həbs cəzası alıb. Onun səhhətinin pisləşməsi, xəstəxanaya köçürülməsi və huşunu itirməsi barədə xəbərlər geniş müzakirə olunur. Fəallar və ombudsman onun azad olunması üçün etiraz aksiyaları keçirir. 

Xarici siyasət blokunda isə Ermənistan-Rusiya münasibətləri ön planda olub. Paşinyan aprelin 1-də Vladimir Putinlə görüşdən sonra iyunun ikinci yarısında yeni yüksək səviyyəli görüş razılaşdırıldığını açıqlayıb. O, əlaqələrin “konstruktiv transformasiya” mərhələsində olduğunu bildirib. Keçmiş prezident Robert Köçəryan isə Ermənistanın Avrasiya İqtisadi İttifaqındakı mövqeyini tənqid edərək, bunun Rusiyanı “incitdiyini” deyib. 

İqtisadi sahədə də maraqlı addımlar qeydə alınıb. Hökumət fermerlər üçün 0 faizli kreditlər proqramını təsdiqləyib. Bu, regional gərginliklər fonunda kənd təsərrüfatına dəstək kimi təqdim olunur. Eyni zamanda qızıl qiymətlərinin artması da medianın diqqətindədir. 

Beynəlxalq kontekstdə Litvanın Ermənistan-Azərbaycan sülh prosesinə dəstəyi və Qazaxıstan Xarici İşlər Naziri ilə keçirilən görüşlər də işıqlandırılıb. 

Ümumilikdə, bu həftə Ermənistan mediası daha çox daxili auditoriyaya yönəlib: seçki kampaniyası qızışır, kilsə ilə konflikt dərinləşir, Rusiya ilə münasibətlər isə balans axtarışında davam edir. 

Qiymət Mahir