Şəhidin xərçəng olan qardaşına pul qıymadı - Vəzifədən çıxarılanda milyonları üzə çıxdı
AMEA Folklor İnstitutunun Qərbi Azərbaycan folkloru şöbəsinin müdir müavini, filologiya üzrə fəlsəfə doktoru Elyar İslamoğlu sosial şəbəkədə paylaşdığı yazıda bir vəzifəli şəxsi tənqid edib.
O, şəhid qardaşı olan şəxsin xərçəng xəstəliyi ilə bağlı kömək istəyinə “50, uzağı 100 manat” cavabı verildiyi, indi isə həmin şəxsin milyonluq əmlak siyahılarının yayıldığını qeyd edib.
Sosial mediada isə bu şəxsin Ovni Muradov olduğu ehtimalı irəli sürülür. Ovni Mehbalı oğlu Muradov 5 avqust 1983-cü ildə Naxçıvan Muxtar Respublikasının Babək rayonunun Nehrəm kəndində anadan olub. 2004-cü ildə Naxçıvan Dövlət Universitetinin tarix ixtisasını bitirib.
Əmək fəaliyyətinə 2002-ci ildə Nehrəm kənd 2 nömrəli tam orta məktəbdə müəllim kimi başlayıb. 2014-cü ildə həmin məktəbin direktoru təyin edilib. 2016-2018-ci illərdə Babək Rayon Təhsil Şöbəsinin müdiri olub. 2018-ci ildə Naxçıvan Muxtar Respublikası Təhsil nazirinin müavini vəzifəsinə yüksəlib. 2023-cü ilin sentyabr-oktyabr aylarında isə nazir vəzifəsini müvəqqəti icra edib.
2024-cü ilin aprelində Prezident İlham Əliyevin sərəncamı ilə Babək Rayon İcra Hakimiyyətinin başçısı təyin olunub. Ailəlidir, iki övladı var. 43 yaşında ikən, 24 sentyabr 2026-cı ildə yenə Prezident sərəncamı ilə vəzifəsindən azad edilib.
Ovni Muradov Naxçıvanın təhsil sistemindən yetişən və qısa müddətdə rayon icra başçısı səviyyəsinə yüksələn məmur olub. Vəzifədən azad edilməsi və sosial mediada dolaşan iddialar onu yenidən gündəmə gətirib. Lakin indiki mərhələdə rəsmi cinayət ittihamı və ya əmlakla bağlı təsdiqlənmiş siyahılar barədə açıq məlumat mövcud deyil.
