İtaliya hava limanında yanğın çıxdı

İtaliyanın Malpensa Hava Limanında baş verən insident nəticəsində "Terminal 1"in 13 nömrəli çıxışı yaxınlığında yanğın baş verib. 

TodayPress TV yerli mediaya istinadən xəbər verir ki, ilkin məlumata görə, bir sərnişin orada yerləşən zibil qutusunu qəsdən yandırıb və nəticədə sərnişinlər arasında panika yaşanıb.

Hadisəni törədən şəxs daha sonra əlindəki çəkiclə bəzi qeydiyyat (check-in) terminallarını dağıdıb.

Hava limanındakı təhlükəsizlik əməkdaşları vəziyyətə dərhal müdaxilə edərək şəxsi zərərsizləşdiriblər. O, hava limanı polisi tərəfindən saxlanılıb.

Eyni zamanda, yanğına müdaxilə edən yanğınsöndürmə briqadaları ehtiyat tədbiri olaraq terminalı tam şəkildə təxliyə edib.

Təhlükəsizlik yoxlamaları başa çatdıqdan sonra terminalda fəaliyyət bərpa olunub və vəziyyət sabitləşdirilib.

Töhfə Səməd