Qulu Məhərrəmli: “Televiziya və radionun cəmiyyətdə rolu danılmazdır”
"Azərbaycanda Radio və Televiziya gününün qeyd olunması cəmiyyətdə televiziya və radionun əhəmiyyətini bir daha xatırladır".
Bu fikirləri jurnalist, televiziya tənqidçisi, publisist, filologiya elmləri doktoru Qulu Məhərrəmli TodayPress TV-yə açıqlamasında deyib.
Onun sözlərinə görə, Azərbaycan radiosunun 100 ilə, televiziyanın isə 70 ilə yaxın tarixi var və bu media vasitələri ölkənin mədəni və milli düşüncəsinin formalaşmasında mühüm rol oynayıb:
"Televiziya və radionun cəmiyyətdəki yeri ilə bağlı mübahisələr onların yarandığı vaxtdan bəri davam edir. Kimsə onları əyləncə vasitəsi, kimsə təbliğat aləti, kimsə də məlumat mənbəyi kimi görür. Çünki televiziya çoxfunksiyalı, sintetik sənət sahəsidir. Həm məlumat verir, həm maarifləndirir, həm də əyləndirir. Hər hansı bir funksiyanın digərlərindən üstün tutulması isə balansı pozur".
Ekspert qeyd edib ki, tamaşaçıların əsas narazılıqları da məhz bu balansın pozulmasından qaynaqlanır:
"Bəzən əyləncə verilişləri çoxalır, bəzən isə keyfiyyətsiz olur. Xəbər proqramları da hər zaman aktuallığı ifadə etmir. Halbuki televiziya cəmiyyətin güzgüsü olmalı, onun ən yaxşı dəyərlərini göstərməlidir. Son illərdə televiziya yeni və ciddi rəqiblə - sosial media ilə üz-üzə qalıb. İndi televiziya 15-20 il əvvəlki statusunu daşımır. Sosial şəbəkələr və internet mediası çox güclü rəqabət yaradır. Bu şəraitdə televiziya və radio üçün fəaliyyət göstərmək asan deyil".
Publisist bildirib ki, televiziya tamaşaçı maraqlarını, ictimai zövqü və peşəkarlığı qoruyarsa, cəmiyyəti düzgün ifadə edə bilər:
"Televiziya vitrindir. Cəmiyyətin ən dəyərli tərəfləri ekranda görünməlidir. Əgər bu yerinə yetirilirsə, tamaşaçı razı qalır. Amma peşəkarlıq aşağı düşəndə və maraqlar nəzərə alınmayanda narazılıqlar yaranır".
Sonda Qulu Məhərrəmli bütün teleradio işçilərini peşə bayramı münasibətilə təbrik edib:
"Bu gün onlar həm də bir növ hesabat verir, proqramlarına yenidən baxırlar, tamaşaçı zövqünə daha çox uyğunlaşmağa çalışırlar. Teleradio işçiləri bəzən tənqid olunur, bəzən sevilir, amma daim cəmiyyətin diqqət mərkəzindədirlər. Biz onlardan daha keyfiyyətli, maraqlı və peşəkar verilişlər gözləyirik", - deyə jurnalist fikrini sonlandırıb.
Qeyd edək ki, noyabrın 6-sı Azərbaycan radio və televiziya işçilərinin peşə bayramı günü kimi qeyd olunur.
Azərbaycan radiosu 1926-cı il noyabrın 6-da fəaliyyətə başlayıb. Azərbaycan Televiziyası yaranandan sonra bu tarix teleradio günü kimi qeyd olunmağa başlanıb.
Türkan İsgəndərli
