Minatəmizləmə üzrə peşə hazırlığı kursu başa çatdı

Azərbaycan Respublikasının Minatəmizləmə Agentliyi (ANAMA) ilə Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi arasında faydalı əməkdaşlıq çərçivəsində birgə təşkil olunmuş növbəti peşə hazırlığı kursu başa çatıb.

TodayPress TV xəbər verir ki, bu barədə Nazirliyin İctimaiyyətlə əlaqələr şöbəsindən bildirilib.

Nəzəri və praktiki təlimlərin əsas məqsədi cəlb edilmiş müdavimlərə humanitar minatəmizləmə və döyüş sahəsinin təmizlənməsi üzrə bilik və bacarıqların öyrədilməsidir.

Həmin təlimlərlə birgə Dövlət Məşğulluq Agentliyi ilə əməkdaşlıq çərçivəsində müdavimlərə “Həyat fəaliyyətinin təhlükəsizliyi mühəndisliyi” mövzusu üzrə hazırlıq kursları da təşkil edilib. Kursa 48 müdavim cəlb edilib və onlarla texniki standartlar və təhlükəsizlik, ilkin yardımın əsasları, zərərçəkmişin təxliyəsi, təhlükənin idarə olunması, texniki təhlükəsizlik qaydaları kimi biliklər paylaşılıb.

Bununla da ANAMA ilə Dövlət Məşğulluq Agentliyinin əməkdaşlığı çərçivəsində təşkil olunan kurslara cəlb edilən müdavimlərin sayı 195-ə çatıb.

Qeyd edək ki, həmin kursları keçənlər işğaldan azad olunmuş ərazilərdə icra edilən humanitar minatəmizləmə fəaliyyətində iştirak edir, ərazilərin mina və müharibənin digər partlayıcı qalıqlarından təmizlənməsi əməliyyatlarına öz töhfələrini verirlər.