Bahar Muradova: "Uşaqların zərərli informasiyadan qorunması dövlətin prioritetidir"

Cəmiyyət

04.11.2025 11:10

"Müasir dövrdə uşaqların zərərli informasiyadan qorunması dünyada olduğu kimi Azərbaycanda da əsas sosial çağırışlardan biridir".

TodayPress TV xəbər verir ki, bunu Ailə, Qadın və Uşaq Problemləri üzrə Dövlət Komitəsinin sədri Bahar Muradova bildirib.

"Bu, həm Prezident İlham Əliyevin, həm də Birinci vitse-prezident Mehriban Əliyevanın daim diqqətində olan məsələdir. Çünki yayılan zərərli məlumatlar təkcə uşaqlara deyil, bütövlükdə ailə institutuna mənfi təsir göstərir".

Onun sözlərinə görə, bu istiqamətdə “Uşaqların zərərli informasiyadan qorunması haqqında” Qanun 2018-ci ildə qəbul edilib və qısa müddətdə mühüm dəyişikliklərə yol açıb:

"Bu qanun uşaqların televiziyada, internetdə və digər media platformalarında yayılan zərərli informasiyalardan qorunması məqsədilə yeni mexanizmlər müəyyən etdi. Dövlət Komitəsi yanında İnformasiya məhsulunun yaş təsnifatının aparılması üzrə Ekspert Şurası yaradılıb və fəaliyyətini uğurla davam etdirir".

Komitə sədri qeyd edib ki, ekspertlərə ixtisas attestasiyasının verilməsi, onların fəaliyyətinin reyestrinin aparılması və media məhsullarının yaş kateqoriyalarına görə təsnifləndirilməsi də bu istiqamətdə həyata keçirilən yeniliklərdəndir.

O əlavə edib ki, Dövlət Komitəsi media, nəşriyyat və təhsil sahəsindəki qurumlarla əməkdaşlıq edərək uşaqların hüquqlarının qorunması üçün maarifləndirmə və nəzarət tədbirlərini davam etdirir:

"Biz yalnız hadisələr baş verəndə reaksiya verməklə kifayətlənməməliyik. Həyatın bütün sahələrində hüquqi baza, maarifləndirmə və nəzarət mexanizmi daim diqqət mərkəzində olmalıdır”, - deyə Bahar Muradova fikrini yekunlaşdırıb.

Türkan İsgəndərli