16 ildir zaman ona toxunmur... — Mübariz İbrahimovun doğum günüdür

“Mən yolumu seçmişəm. Düşməndən ürəyimcə qisas almasam, elə bilərəm ki, Allahım da, valideynlərim də məni bağışlamaz. Vətənin azadlığı üçün qurban lazımdırsa, biri mən...”.

(Mübariz İbrahimovun son məktubundan)

1988-ci ilin fevralında Biləsuvarda dünyaya gələn Mübariz adi bir həyat yaşaya bilərdi. Yaşaya da bilərdi, amma o...

Bu gün Azərbaycan Silahlı Qüvvələrinin giziri, Azərbaycanın Milli Qəhrəmanı Mübariz İbrahimovun doğum günüdür. Onun adı müasir Azərbaycan tarixində təkcə hərbi qəhrəmanlıq nümunəsi kimi deyil, həm də cəmiyyətin milli ləyaqət anlayışına baxışının dəyişdiyi mərhələnin simvolu kimi yer alıb.

1988-ci il fevralın 7-də Biləsuvar rayonunda anadan olan Mübariz İbrahimov həqiqi hərbi xidmətini başa vurduqdan sonra mülki həyata qayıtsa da, bölgədə davam edən hərbi-siyasi gərginlik və işğal faktoru onun şəxsi qərarına təsirsiz ötüşməyib. O, könüllü şəkildə yenidən ordu sıralarına qayıdaraq xüsusi təyinatlı bölmədə xidmətini davam etdirib.

Mübariz İbrahimov 2010-cu ilin 18 iyunundan 19-na keçən gecə məktub yazaraq, xidmət etdiyi bölmədə heç kimə xəbər vermədən təmas xəttinin bir kilometrlik minalanmış sahəsini keçir. Sonra isə düşmənin silahlarından onun özünə qarşı istifadə edərək 5 saat təkbətək döyüşür. Baş tutan döyüş zamanı o, 4 erməni əsgərini (müxtəlif mənbələrə görə isə bu say 45-dir) məhv edir. 

Düşmənə çox ağır itkilərə yaşadır. Azərbaycan döyüşçüsü səhərə yaxın qeyri-bərabər döyüşdə qəhrəmancasına şəhid olur.  

Döyüşdən sonra Azərbaycan tərəfi Mübariz İbrahimovun cəsədinin qaytarılması ilə bağlı qarşı tərəfə rəsmi müraciət edib. Ermənistan tərəfi əvvəlcə cəsədin öz nəzarətində olduğunu bildirsə də, daha sonra bu mövqeyi dəyişərək Mübariz İbrahimovun nəşinin neytral zonada qaldığını bəyan edib.

Bununla belə, avqustun 2-də Rusiya mənşəli internet resurslarında Mübariz İbrahimova aid olduğu iddia edilən fotoşəkillər yayılıb. Bu görüntülər Azərbaycan cəmiyyətində geniş müzakirələrə səbəb olub. Azərbaycan Müdafiə Nazirliyi məsələ ilə bağlı açıqlama verərək bildirib ki, sözügedən materialların yayılması beynəlxalq humanitar hüquq normalarına ziddir.  

Nazirlik eyni zamanda vurğulayıb ki, Azərbaycan tərəfi Mübariz İbrahimovun cəsədinin qaytarılması istiqamətində səylərini davam etdirir və bu məqsədlə mövcud olan bütün diplomatik və hüquqi imkanlardan istifadə ediləcək.

Aylarla davam edən danışıqlardan sonra oktyabrda Rusiyanın vasitəçiliyi ilə Həştərxan şəhərində imzalanan bəyannaməyə əsasən Mübariz İbrahimovun nəşi 6 noyabr 2010-cu ildə Azərbaycan tərəfinə təhvil verilib. O, İkinci Fəxri Xiyabanda dəfn edilib. Azərbaycan Prezidenti İlham Əliyevin 22 iyul 2010-cu il tarixli fərmanı ilə Mübariz İbrahimova Azərbaycanın Milli Qəhrəmanı adı verilib.

“Vətənin dar günündə ürəyim dözmür” yazmışdı… 

İkinci Qarabağ müharibəsi zamanı, 4 oktyabr 2020-ci ildə Mübariz İbrahimovun həlak olduğu yer Azərbaycan Silahlı Qüvvələri tərəfindən azad edildi və burada Azərbaycan bayrağı dalğalandırıldı.  

Əminik ki, bu gün Mübarizin ruhu şaddır! 

Qiymət Mahir