ÇL oyunundan sonra hakim qərarları müzakirə olundu
“Real Madrid” klubunun müdafiəçisi Daniel Carvaxal UEFA Çempionlar Liqasının (ÇL) 1/4 finalında “Bavariya” ilə cavab oyunundan sonra baş hakim Slavko Vinçiçə kəskin etiraz edib.
TodayPress TV xəbər verir ki, matçın 89-cu dəqiqəsində “Bavariya”nın üçüncü qolundan sonra Karvaxal əsəbiləşərək əvvəlcə dördüncü hakimi göstərib və “Bu sənin günahındır!” deyə qışqırıb.
Daha sonra o, baş hakim Vinçiçə yaxınlaşaraq eyni ifadəni bir neçə dəfə təkrarlayıb.
Oyunun 86-cı dəqiqəsində isə Eduardo Camavinqa rəqib Harri Keynə qarşı qayda pozuntusundan sonra topu vermədiyi üçün ikinci sarı vərəqə alaraq meydandan qovulub. Bu epizod Madrid klubunun narazılığına səbəb olan əsas məqamlardan biri olub.
Matçdan sonra “Real”ın baş məşqçisi Alvaro Arbeloa hakimin oyuna təsir etdiyini və qarşılaşmanı korladığını bildirib.
Qeyd edək ki, Çempionlar Liqasında “Bavariya” - “Real Madrid” komandaları arasında keçirilən cavab 1/4 final matçı 4:3 hesabı ilə Münhen təmsilçisinin xeyrinə başa çatıb və iki oyunun cəminə görə (6:4) Almaniya çempionu yarımfinala yüksəlib.
Namiq HUN
