Amina Məhəmməd: Azərbaycan bizi öyrədir
BMT Baş katibinin müavini mənzil məsələsinə insan mərkəzli yanaşmanın vacibliyini vurğulayıb və Azərbaycanın bərpa təcrübəsini nümunə kimi dəyərləndirib.
TodayPress TV xəbər verir ki, bunu BMT Baş katibinin müavini Amina Məhəmməd WUF13-ün rəsmi bağlanış mərasimində çıxışı zamanı deyib.
O bildirib ki, kənd icmalarından qeyri-formal yaşayış məntəqələrinə, şəhərlərə qədər mənzil məsələsinə insan və ləyaqət prizmasından yanaşmaq lazımdır.
Amina Məhəmməd qeyd edib ki, belə yanaşma dayanıqlılığı gücləndirməli, mədəni, sosial və iqtisadi həyatın canlı mərkəzlərini bərpa etməli və gələcəyi insanı mərkəzdə saxlayaraq formalaşdırmalıdır.
“Azərbaycanın öz ərazilərində həyata keçirdiyi yenidənqurma, davamlı sülh və inkişaf siyasəti infrastrukturun bərpası, icmaların yenidən inteqrasiyası və iqtisadi potensialın açılması baxımından nümunə kimi çıxış edir. Dünya hazırda iqlim dəyişikliklərinin təsirləri, münaqişələr, bərabərsizlik, mənzil təhlükəsizliyi problemləri və artan borc təzyiqlərinin yaratdığı bir-biri ilə əlaqəli böhranlarla üz-üzədir. Bu təzyiqlər dövlətlərin fiskal imkanlarını məhdudlaşdırır və əlçatan mənzil, dayanıqlı infrastruktur və əsas xidmətlərə investisiya yatırmaq imkanlarını zəiflədir”.
O qeyd edib ki, forum çoxtərəfli əməkdaşlığın, çoxsəviyyəli idarəetmənin və yerli fəaliyyətin əhəmiyyətini bir daha nümayiş etdirib.
BMT Baş katibinin müavini əlavə edib ki, WUF13 BMT sistemi çərçivəsində beynəlxalq ictimaiyyətin mənzil böhranı və urbanizasiya məsələləri ətrafında birləşməsinin vacibliyini göstərib və bu istiqamət Dayanıqlı İnkişaf Məqsədlərinin həyata keçirilməsi üçün strateji sürətləndirici rol oynayır.
Qiymət Mahir
