Unikal bank əmanətçilərinin sayı 200 minə yaxınlaşdı
2025-ci ilin yekununda Azərbaycanda təxminən 194 min unikal bank əmanətçisi olub ki, bu da 2024-cü ilin yekunu ilə müqayisədə 81,3 % çoxdur.
TodayPress TV xəbər verir ki, bunu Azərbaycan Mərkəzi Bankının (AMB) sədri Taleh Kazımov bu gün keçirdiyi mətbuat konfransında bildirib.
"İl ərzində müddətli depozitlərin artımı da sürətlənib. 2024-cü ildə artım 1,8 milyard manat təşkil etdiyi halda, 2025-ci ildə 2,3 milyard manat olub. Bu, bank sektoruna inamın güclənməsi, sektorun əhalini özünə daha çox cəlb etməsinin göstəricisidir", - deyə o qeyd edib.
T.Kazımov Azərbaycanda əmanətlərin sığortalanması faizinin yeni metodologiya ilə müəyyən edilməsinə də münasibət bildirib: "Biz bu yanaşmanı öz təşəbbüsümüzlə, Əmanətlərin Sığortalanması Fondu (ƏSF) ilə çox sıx əməkdaşlıq şəraitində həyata keçirmişik. İstəyimiz o idi ki, şəffaf, hamının başa düşdüyü bir qayda formalaşdırılsın. Çünki vaxtilə mənim üçün də həmişə sual idi ki, sığortalanma faizi niyə 12 %-dir? Biz bunu bir qayda formasına saldıq ki, hamı başa düşsün ki, faiz dəyişirsə, niyə dəyişir?"
Bundan başqa, onun sözlərinə görə, gələn il AMB ƏSF-yə ödənişlərin bankların risk profilindən asılı olaraq diferensiallaşması ilə bağlı müzakirələrə yenidən başlayacaq: "Bu sahədə müzakirələrimiz həm AMB-nin daxilində, həm də Fondla gedir. Bildiyiniz kimi, bu ildən başlayaraq risk əsaslı tənzimləməyə keçirik. Bütün bankları bu yanaşma əhatə edəcək. Digər tərəfdən ƏSF ilə risk əsaslı təqvim haqlarının formalaşdırılmasını da müzakirə edirik. Amma hər hansı konkret tarix yoxdur ki, biz bunu nə vaxta qədər edəcəyik".