Təhsil sənədləri elektronlaşır: Tələbə və məzunlar üçün yeni imkanlar
"Azərbaycanda təhsil sənədlərinin elektron formata keçirilməsi tələbələr və məzunlar üçün mühüm üstünlüklər vəd edir".
Bunu TodayPress TV-yə danışan təhsil eksperti Ramin Nurəliyev bildirib.
Onun sözlərinə görə, Nazirlər Kabinetinin qərarına əsasən ali, orta ixtisas, peşə və ümumi təhsil pillələri üzrə diplomlar, attestatlar, sertifikatlar və onlara əlavələr artıq hüquqi qüvvəyə malik elektron sənədlər kimi formalaşdırılacaq:
"Bu qərar dünya təcrübəsinə uyğun olmaqla yanaşı, tələbələr üçün ciddi rahatlıq yaradacaq. İnkişaf etmiş ölkələrdə elektron diplomlar artıq uzun müddətdir tətbiq olunur. Türkiyədə də bunun real nümunələrini görürük. Bu sistemin Azərbaycanda tətbiqi tələbələr üçün böyük üstünlükdür".
Ekspertin fikrincə, elektron attestatların tətbiqi xüsusilə xaricdə təhsil almaq istəyən gənclər üçün vaxt itkisini aradan qaldıracaq:
"İndiyədək bəzi regionlarda attestatların verilməsində gecikmələr müşahidə olunurdu. Yeni qərarla bu problem aradan qalxacaq və məzunlar maksimum 10 gün ərzində elektron sənədlərini əldə edə biləcəklər. Eyni problem ali təhsil müəssisələrini bitirən gənclər üçün də aktual idi. Bu vaxta qədər diplomların verilməsi aylarla, bəzi hallarda isə hərbi xidmət səbəbindən daha uzun çəkirdi. Elektron diplomların tətbiqi xüsusilə xaricdə magistratura təhsili almaq istəyən gənclər üçün yeni imkanlar açacaq".
O vurğulayıb ki, qərar yalnız məzunlara deyil, təhsilini yarımçıq dayandıran və ya müvəqqəti fasilə verən şəxslərə də aiddir. Belə şəxslər artıq arayış almaq üçün universitetlərdə növbələrdə dayanmayacaq, sənədlərini elektron formada əldə edərək istənilən quruma təqdim edə biləcəklər:
"Məzunlar artıq aylarla diplom gözləmədən elektron sənədlə işə müraciət edə biləcəklər və bu da onların iş həyatına daha tez inteqrasiya olunmasına şərait yaradacaq. Cəmiyyətdə bu qərarla bağlı yanlış fikirlər də yayılıb. Bəzi şəxslər bunu fəaliyyəti dayandırılmış ali təhsil müəssisələrində oxuyanların diplom əldə etməsi kimi şərh edir, lakin bu, tamamilə yanlışdır. Bağlanmış ali təhsil müəssisələrində oxuyan şəxslərə diplom verilməsi nəzərdə tutulmur. Yalnız həmin şəxsin müəyyən müddət təhsil aldığını təsdiq edən arayış təqdim oluna bilər. Bu arayış diplomu əvəz etmir", – deyə Ramin Nurəliyev bildirib.
Qeyd edək ki, artıq ali, orta ixtisas, peşə və ümumi təhsil pillələri üzrə diplomlar, attestatlar, sertifikatlar və onlara əlavələr hüquqi qüvvəyə malik elektron sənədlər kimi formalaşdırılacaq. Hətta təhsilini müxtəlif səbəblərdən tamamlaya bilməyən şəxslərə də verilən arayışlar elektron sənəd formasında yaradılacaq.
Türkan İsgəndərli
