Hantavirus otaq temperaturunda maksimum nə qədər "sağ qalır?" - Həkimdən AÇIQLAMA
Hantavirus otaq temperaturunda uzun müddət - iki həftəyə qədər aktivliyini qoruyur.
TodayPress TV xəbər verir ki, bu barədə Novosibirsk Dövlət Universitetinin Tibb və Tibbi Texnologiyalar İnstitutunun həkim-infeksionisti Yuliya Yermolayeva TASS-a müsahibəsində məlumat verib.
Mütəxəssisin sözlərinə görə, patogen üçün optimal şərait yüksək rütubətlə birlikdə 4°C ətrafında davamlı aşağı temperaturdur.
Yuliya Yermolayevanın sözlərinə görə, hantavirus infeksiyasına yoluxma halları il boyu qeydə alınır, lakin pik həddi ənənəvi olaraq yay və payız aylarına təsadüf edir.
Mütəxəssis izah edib ki, bu, hava şəraitindən daha çox insanların davranışı ilə bağlıdır, belə ki, isti mövsümdə insanlar daha aktiv şəkildə təbiətdə açıq havada vaxt keçirməyə gedirlər, bağ evlərində işləyirlər, meşəyə gedirlər, kənd təsərrüfatı və ağac kəsimi ilə məşğul olurlar. Bundan əlavə, elə bu dövrdə virusun əsas daşıyıcısı olan gəmiricilərin də populyasiyası artır.
Yuliya Yermolayeva xəbərdarlıq edib ki, qışda yoluxma mexanizmi dəyişir, lakin risk yox olmur - soyuq hava siçanları və siçovulları daha isti yerlərə - tövlələrə, qarajlara və evlərə köçməyə məcbur edir.
İlin bu dövründə tikililərin zəif ventilyasiyası hava-toz yolu ilə ötürülmə təhlükəsini artırır. Həkim əlavə edib ki, həmçinin qışda tez-tez insan orqanizmi zəifləyir, həyat tərzi isə potensial çirklənmiş səthlərlə daha sıx təmasa səbəb olur.
Xatırladaq ki, ötən həftə Ümumdünya Səhiyyə Təşkilatı (ÜST) Argentinadan Kabo-Verdeyə gedən "MV Hondius" kruiz laynerində hantavirusun yayıldığını elan edib. Gəmidə bir neçə yoluxma halı qeydə alınıb və yoluxmuş şəxslərdən üçünün həyatını xilas etmək mümkün olmayıb.
Mayın 10-da gəmi İspaniyanın Tenerife adasının limanına çatıb və bundan sonra sərnişinlərin təxliyəsi əməliyyatı başlayıb. ÜST-nin baş direktoru Tedros Adhanom Qebreyesus insanların 10 uçuşda təxliyə edilməsinin planlaşdırıldığını bildirib. 14 İspaniya vətəndaşından ibarət ilk sərnişin qrupu paytaxtdakı xəstəxanalardan birinə aparılıb.
