Köpəkbalığı hücumunda ayağını itirən futbolçu danışdı
Maldiv adalarında bal ayında olarkən köpəkbalığının hücumuna məruz qalaraq ayağını itirən ispaniyalı yarıpeşəkar futbolçu və ginekoloq Borja Qarsiya Sousa gələcəklə bağlı planlarını bölüşüb.
TodayPress TV xəbər verir ki, bu haqda "Gazeta.ru"da məqalə dərc olunub.
Belə ki, 31 yaşlı futzalçı aprelin 11-də Kuddhu adası yaxınlığında pələng köpəkbalığının hücumuna məruz qaldıqdan sonra sağ ayağını itirib. Sousanın həyat yoldaşının sözlərinə görə, “Köpəkbalığı bir dişləmə ilə ərimin ayağının dizdən aşağı hissəsindəki bütün əti qopardı”.
Məlumata görə, hadisə tur operatorunun səhlənkarlığı nəticəsində baş verib. Belə ki, turist qrupu ac və aqressiv köpəkbalıqlarının müşahidə oluna biləcəyi balıq emalı müəssisəsinin yaxınlığında suya daxil olub. Həkimlər əsas damarların geri dönməz şəkildə zədələnməsi və uzun müddət davam edən işemiya səbəbindən ayağın amputasiya edilməsinə qərar veriblər.
Male şəhərindəki xəstəxanada müalicə alan ispan gələcəklə bağlı düşüncələrini bölüşüb:
“İspaniyaya qayıtmağı, ağrıyana qədər gülməyi, duyğulardan ağlamağı, sanki zaman dayanmış kimi sevdiklərimi qucaqlayıb öpməyi necə də arzulayıram”, – deyə o bildirib.
Sousa yaşadığı ağır itkiyə baxmayaraq, bu sınağın onu sındırmadığını vurğulayıb:
“Həyat yoldaşımla bir an belə bunun yolumuzda aşılmaz maneəyə çevriləcəyinə inanmadıq. Biz irəliləmək üçün mütləq bir yol tapacağımıza əmin idik”.
O, həmçinin həyat yoldaşına təşəkkür edərək, onu belə ağır sınaqda yanında ola biləcək ən güclü insan adlandırıb.
Hazırda Sousa Maldiv adalarında qalır və vətəninə qayıtmaq üçün tibbi icazə gözləyir. O, İspaniyaya döndükdən sonra uzunmüddətli fiziki və psixoloji reabilitasiya prosesinə başlayacaq.
Jalə Rövşən
