İranın Azərbaycandan məhsul idxalı azaldı

Cari İran ilinin 4 ayı (21 mart -22 iyul 2025) ərzində İranın Azərbaycandan məhsul idxalı ötən İran ilinin analoji dövrü ilə (20 mart -21 iyul 2024) müqayisədə dəyər baxımından 48,3%, çəki baxımından 45,8% azalıb.

TodayPress TV bu barədə İranın Gömrük Administrasiyasının statistikasına istinadən xəbər verir.

Statistikaya əsasən, 4 ayda İranın Azərbaycandan məhsul idxalı 3,32 milyon dollar dəyərində 1,79 min ton təşkil edib.

Statistikada deyilir ki, ötən ilin analoji dövründə İran Azərbaycandan 6,43 milyon dollar dəyərində 3,3 min ton məhsul idxal edib.

Statistikada qeyd olunur ki, İran Azərbaycandan müxtəlif avadanlıqlar, sıxılmış soya, müxtəlif növ profillər və sairə məhsullar idxal edib.

Statistikaya görə, 4 ayda İranın Azərbaycanla ticarət dövriyəsi 182 milyon dollar dəyərində 276 min ton təşkil edib. Ticarət dövriyyəsi ötən ilin analoji dövrü ilə müqayisədə dəyər baxımından 25%, çəki baxımından 7,5% azalıb.

Əlavə edək ki, İran Gömrük Administrasiyasının statistikasına əsasən cari İran ilinin 4 ayı ərzində İrana 17,6 milyard dollar dəyərində 12,2 milyon ton məhsul idxal edilib. Məhsul idxalı ötən ilin analoji dövrü ilə müqayisədə dəyər baxımından 14,2%, çəki baxımından 3,23% azalıb.

Qeyd edək ki, İran məhsul idxalında əsasən ölkənin ehtiyac duyduğu zəruri məhsulların idxalına önəm verir və ölkədə istehsal olunan məhsulların bənzərinin ölkəyə idxal olunmasına müəyyən məhdudiyyətlər tətbiq edir.