Vavrinka karyerasının Paris səhifəsini bağladı
İsveçrəli tennisçi Sten Vavrinka karyerasında “Rolan Qarros”dakı son matçından sonra emosional açıqlama verib.
TodayPress TV xəbər verir ki, təcrübəli tennisçi Fransa Açıq çempionatının ilk mərhələsində niderlandlı Yesper de Yonga 1:3 hesabı ilə məğlub olaraq turnirlə vidalaşıb.
Vavrinka qarşılaşmadan sonra keçirilən mətbuat konfransında Parisdəki turnirlə vidalaşmağın onun üçün çox ağır olduğunu bildirib.
“Azarkeşlərdən, oyunçulardan və ümumilikdə turnirdən gələn böyük sevgiyə və dəstəyə həmişə təəccüblənmişəm. Mən 20 ildən çoxdur turdayam. Gənclikdə arzum peşəkar tennisçi olmaq, TOP-100-ə düşmək və belə turnirlərdə oynamaq idi. Tennisdə bu qədər yüksələ biləcəyimi gözləmirdim. Karyeram boyunca heç vaxt özümə limit qoymadım, daim daha artığını istədim və çox çalışdım. Öz sərhədlərimi aşmağa çalışdım. Bu illərdə əldə etdiklərimlə fəxr edirəm. Həyatını həsr etdiyin və çox sevdiyin bir şeylə vidalaşmaq heç vaxt asan olmur. “Rolan Qarros”u tərk etmək mənim üçün çox çətindir”, – deyə Vavrinka bildirib.
Qeyd edək ki, Sten Vavrinka karyerası ərzində üç “Böyük Dəbilqə” titulunun sahibi olub və 2015-ci ildə məhz Fransa Açıq çempionatının qalibi adını qazanıb.
Namiq HUN
