Elşad Mirini efirə qoymadılar — Televiziyalara savaş açdı
İlahiyyatçı alim Elşad Miri bəzi televiziya kanallarında ona qadağa tətbiq olunduğunu iddia edərək, bunun məzhəb amili ilə əlaqəli olduğunu bildirib.
TodayPress TV xəbər verir ki, Elşad Miri bu barədə özünün “Facebook” hesabında paylaşım edib.
İlahiyyatçı İctimai Televiziyanın Baş direktoru Balakişi Qasımovun yenidən bu vəzifəyə seçilməsi xəbərindən sonra yazdığı statusa diqqət çəkib.
“İctimai TV-dəki şəxsimə olan qadağa yenə qüvvəsində qalacaq. Məzhəbçilik çox pisdir, çox”, – deyə o qeyd edib.
Elşad Miri bildirib ki, onun üçün əsas məsələ efirə çıxarılıb-çıxarılmaması deyil, bəzi media rəhbərlərinin məsələlərə məzhəb prizmasından yanaşmasıdır.
“Burada unudulan nüans hansısa kanala dəvət edilib-edilməməyim deyil. Məzhəbçiliyin təhlükəli olduğunu göstərməkdir”, – deyə o vurğulayıb.
Onun sözlərinə görə, İctimai TV-də çalışan bəzi şəxslər çıxışlarının kanal rəhbərliyinin məzhəbi baxışlarına uyğun gəlmədiyi üçün onu verilişlərə dəvət edə bilmədiklərini bildiriblər.
Elşad Miri paylaşımında millət vəkili Fazil Mustafa ilə bağlı da iddia səsləndirib.
“İctimai TV-nin qapıları illərdir Fazil bəyin üzünə də qapalıdır”, – deyə o yazıb.
İlahiyyatçı daha sonra bəzi digər televiziya kanallarında da oxşar münasibətlə üzləşdiyini iddia edib. O, Mirşahin Ağayev, Murad Dadaşov və digər media rəhbərlərinin adlarını çəkərək bu barədə fikirlərini bölüşüb.
Elşad Miri sosial şəbəkələrdə və internet platformalarında geniş auditoriyaya malik olduğunu bildirərək, televiziya efirlərinə çıxmaq niyyətində olmadığını qeyd edib.
“Allaha şükürlər olsun, internet resurslarında 100 minlərlə abunəsi olan müxtəlif kanallarım var və hansısa kanala çıxmaq arzusunda da deyiləm”, – deyə o əlavə edib.
Qiymət Mahir
