Milli ruhu canlandıran simvollar – ARAŞDIRMA

Azərbaycan bu günə qədər bir çox beynəlxalq idman və mədəniyyət tədbirlərinə ev sahibliyi edib. Həmin tədbirlərin simvolları olan maskotlar, ölkənin zəngin mədəni irsini və təbii gözəlliklərini dünyaya tanıtmaq məqsədi daşıyır. 

TodayPress TV brend halına gələn həmin simvolları təqdim edir:

"Bakı 2015 Avropa Oyunları" Azərbaycan təbiətinin incilərindən olan iki Ceyran və Narı təqdim edib. Ceyran zərifliyi və çevikliyi ilə Azərbaycanın dağ ceyranını, Nar isə ölkəmizin bərəkət simvolu olan nar meyvəsini təmsil edir. 

Daha sonra, "Bakı 2017 IV İslam Həmrəyliyi Oyunları" ölkəmizin milli sərvəti, dünyanın bir çox ölkələrində gözəllikləri ilə göz oxşayan Qarabağ atlarını, "İncə" və "Cəsur"u özünə rəmz kimi seçib.

"İncə” atı zəriflik və gözəllik nümunəsi olması ilə bərabər, eyni zamanda incəliyi və məlahəti əks etdirir, adət-ənənələri və milli dəyərləri təmsil edir.

"Cəsur”, digər Qarabağ atları kimi özünə əminliyi və sərbəstliyi ilə seçilir. O, həm də mehribanlığı, hər kəsə olan sevgi və diqqəti ilə tanınır.

2019-cu ildə paytaxtda baş tutan "XV Yay Avropa Gənclər Olimpiya Festivalı"nın (AGOF) rəsmi rəmzləri isə Cırtdan və Bəbirdir. Balaca oğlan Cırtdan Azərbaycanda uşaqların ən populyar nağıl personajlarından biridir. O, güclü milli özünəməxsusluğu, dərrakəsi, hazırcavablığı, mübarizliyi və başqalarına rəğbəti ilə seçilir.

Bəbir isə Azərbaycanın füsunkar təbiətinin zənginliyini təşviq edir. Bu heyvan təbii gözəllik, güc, qorxmazlıq və sürət rəmzidir.

Futbol üzrə Avropa çempionatı “Avro-2020”nin rəsmi talismanı “Skillzi” olub. İngilis dilində “bacarıq” mənasını daşıyan “skills” sözündən götürülüb. “Bacarıqlı oğlan” ilk dəfə bu il martın 24-də Niderland və Almaniya arasında matç zamanı təqdim edilib.

Bakıda keçirilən 2025-ci il Minifutbol üzrə Dünya Çempionatının rəsmi talismanı Maralzadə adlı maraldır. Maralzadə, çempionatın rəsmi maskotu olaraq, tədbirlərin simvolu və Azərbaycanın qonaqpərvərliyinin təcəssümü kimi çıxış edib.Digər beynəlxalq tədbirlərdə, məsələn, "2019 UEFA Avropa Liqasının Finalı", "Formula 1 Azərbaycan Qran Prisi" və "Avroviziya 2012" kimi prestijli tədbirlərdə xüsusi maskot təqdim edilməsə də, tədbirin əyləncəli və dinamik atmosferinin yaradılması üçün müxtəlif interaktiv zonalar təşkil olunub.

2024-cü ilin noyabrında Bakıda keçirilən "COP29" (Birləşmiş Millətlər Təşkilatının İqlim Dəyişikliyi üzrə 29-cu Konfransı) tədbirinin rəsmi maskotu təqdim olunmayıb. Əvəzində, tədbirin simvolu olaraq xüsusi bir loqo hazırlanıb.

Azərbaycanın beynəlxalq yarış və tədbirlərində maskotların seçimi hər zaman milli simvollarımızın, mədəniyyətimizin və təbiətimizin təbliği məqsədini daşıyıb. Bu maskotlar ölkəmizin dünya arenasında tanınmasında və dostluq, həmrəylik mesajlarının yayılmasında böyük rol oynayıb.

Türkan İsgəndərli