Minsk qrupu ləğv olundu: "Azərbaycan dialoqu birbaşa aparır"
"Azərbaycan hər zaman diplomatik kanalların və dialoqun tərəfində olduğu üçün ATƏT-in Minsk qrupunun fəaliyyətinə razılıq vermişdi".
Sosial Tədqiqatlar Mərkəzinin əməkdaşı Kazım Kazımov bunu TodayPress TV-yə açıqlamasında deyib.
O, Azərbaycanın 1992-ci ilin yanvarında ATƏM-ə üzv olduğunu və həmin ilin mart ayından etibarən Minsk qrupu qurulduğunu bildirib:
"Onun müxtəlif dövrlərdə fərqli həmsədrləri olub. Lakin onu daha çox Fransa, Rusiya və ABŞ adları ilə assosasiya edə bilərik. Nə Birinci Qarabağ müharibəsi, nə İkinci Qarabağ müharibəsi dövründə, nə də postmüharibə mərhələsində onların heç bir real addımını görmədik. Xüsusilə 1993-cü ildə “3-cü paket” adlandırdıqları, guya sülhə xidmət edən sənəd Ulu Öndər Heydər Əliyev tərəfindən qətiyyətlə rədd edilmişdi. Azərbaycan Prezidenti İlham Əliyevin də vurğuladığı kimi, onların fəaliyyətinə ehtiyac qalmayıb. Onsuz da, əvvəllər də real fəaliyyətləri yox idi, sadəcə, Azərbaycan hər zaman diplomatik kanalların və dialoqun tərəfində olduğu üçün ATƏT-in Minsk qrupunun fəaliyyətinə razılıq göstərmişdi. Lakin biz müharibə ilə qalib gəldik. Prezident də müharibədən dərhal sonra ifadə etdi ki, Minsk qrupunun fəaliyyətinə ehtiyac yoxdur".
Ekspert 2024-cü ildə Prezident İlham Əliyevin ATƏT-ə müraciətindən bəhs edib:
"2024-cü ilin fevralında Prezident ATƏT-ə müraciət etdi ki, Minsk qrupu fəaliyyətini dayandırmalıdır. Onlar da Nazirlər Şurasında bunu qəbul etdilər. 1 sentyabr 2025-ci il tarixində onun fəaliyyətinə xitam verildi. Dekabrda isə bütün strukturları ləğv edilmiş hesab olunacaq. Bunun təbii ki, müsbət tərəfləri var. Məsələn, Minsk qrupuna quruluş etibarilə baxsaq, Fransa zaman-zaman erməni lobbisinin təsiri altında hərəkət etmişdi. ABŞ-də isə Demokratların iqtidarda olduğu dövrlərdə, xüsusilə sabiq prezident Cozef Baydenin prezidentliyi zamanı erməni lobbisinin Ağ Evdə və Konqresdə nə qədər “fəal” olduğunu görmüşük. Burada anti-Azərbaycan baxışlar mövcud idi ki, bu da Minsk qrupunun fəaliyyətinə təsir edirdi. Onlar İrəvan-Bakı arasındakı birbaşa dialoqu yayındırmağa çalışırdılar. Halbuki bu dialoq iki ölkə arasında açıq şəkildə davam edir. Vaşinqtonda ABŞ–Azərbaycan–Ermənistan üçtərəfli görüşü keçirildi və artıq Azərbaycanın istəklərinə uyğun olaraq sülhün təməlinin qoyulduğunu deyə bilərik".
K.Kazımov onu da əlavə edib ki, ATƏT-in Minsk qrupunun bundan sonra fəaliyyətində heç bir ciddi əhəmiyyət daşımayacağı aydın idi. Əksinə, lobbilərin dolayı təsiri ilə sülh prosesi əngəllənə bilərdi. Ona görə də, qurumun fəaliyyətinə xitam verilməsi daha faydalı oldu.
Qeyd edək ki, Azərbaycan Xarici İşlər Nazirliyinin Mətbuat xidməti idarəsindən verilən məlumata görə, Azərbaycan Respublikasının Prezidenti və Ermənistan Respublikasının Baş nazirinin ABŞ Prezidentinin dəvəti və iştirakı ilə 2025-ci il avqustun 8-də Vaşinqton şəhərində baş tutmuş görüşü çərçivəsində Azərbaycan və Ermənistan xarici işlər nazirlərinin ATƏT-in Fəaliyyətdə olan Sədrinə ünvanlanmış birgə müraciət məktubuna uyğun olaraq, ATƏT-in Minsk Prosesinin, ATƏT-in Fəaliyyətdə olan Sədrinin ATƏT-in Minsk Konfransının məşğul olduğu münaqişə üzrə Şəxsi Nümayəndəsinin və Yüksək Səviyyəli Planlaşdırma Qrupunun fəaliyyətinə sentyabrın 1-dən etibarən xitam verilib.
Sözügedən strukturların bağlanmasından irəli gələn təşkilati və texniki məsələlərin 2025-ci il dekabrın 1-dən gec olmayaraq yekunlaşdırılması ATƏT Katibliyinə tapşırılıb.
Qərarda, həmçinin keçmiş Ermənistan-Azərbaycan münaqişəsi ilə bağlı ATƏT çərçivəsində vaxtilə qəbul edilmiş bütün qərarlar qüvvədən düşmüş və etibarsız elan olunub.
Qiymət Mahir
FOTOLAR
